Иргэн Т.Мөнх-Оргил гэх жиргээч хотын мээр Э.Бат-Үүлийг олон нийтийн мэдээллийн хэрэгсэл ашиглан жиргээчид болон бусад иргэдээс ёс суртахууны зөрчил гаргасныхаа төлөө уучлалт гуйх ёстой хэмээн шүүхэд гомдол гаргасан юм. Гэвч шүүх хуралдаан товлогдохгүй удааширсан  тул тэрбээр Шүүхийн ерөнхий завлөлд ханджээ.  Улмаар шүүх хуралдаан өнөөдөр 13.00 цагт болсон ч  Улаанбаатар хотын захирагч Э.Бат-Үүл шүүх хуралд ирээгүй.  Түүний өмгөөлөгч В.Гомбодорж шүүх хуралдаанд оролцсон юм. 
Шүүх хуралдааны шийдвэр гарч иргэн Т.Мөнх-Оргилын гомдлыг бүхэлд нь хэрэгсэхгүй болгож шийдвэрлэв. Шүүх хурлын дараа Нийслэлийн Засаг дарга Э.Бат-Үүлийн өмгөөлөгч В.Гомбодорж “Иргэний гомдлыг бүхэлд нь хэрэгсэхгүй болгож шийдвэрлэлээ. Өөр ярих зүйл алга” хэмээсэн. Харин шүүхэд гомдол гаргасан жиргээч, иргэн Т.Мөнх-Оргил шүүхийн шийдвэртэй эвлэрэхгүй байгаагаа илэрхийлж “Цаанаасаа зохион байгуулагдсан шийдвэр гарлаа гэж үзэж байна. Нийгэм ийм л болчихож. Бодож байж цаашид яахаа төлөвлөнө. Энэ хэрэг цааш үргэлжилнэ” гэв.