Үнийн хөнгөлөлттэй зарах эмийг үнэтэй борлуулж байжээ

Шуурхай:

Үнийн хөнгөлөлттэй зарах эмийг үнэтэй борлуулж байжээ

2014-11-19 11:49:46

Нийслэлийн мэргэжлийн хяналтын газрын төлөвлөгөөний дагуу эрүүл мэндийн даатгалын сангаас санхүүжилт авч буй эмийн сангуудад “Нийгмийн даатгалын тухай”, ”Иргэний эрүүл мэндийн даатгалын тухай” хуулийн хэрэгжилтийг шалгажээ. Шалгалтад эрүүл мэндийн даатгалын санхүүжилтийн гэрээ байгуулсан 124 эмийн сангаас 116 нь хамрагдсан байна. Эмийн сангууд эрүүл мэндийн даатгалтай иргэдэд нутаг дэвсгэрийн харьяалал харгалзахгүйгээр Нийгмийн даатгалын Үндэсний зөвлөлийн өнгөрсөн оны 28-р тогтоолд заасны дагуу эмийг хөнгөлөлттэй үнээр, цаг тухайд нь өгч, төрийн үйлчилгээг хүргэн ажиллаж байна. Тухайлбал, Багануур, Багахангай дүүргийн эмийн сангуудаас эрүүл мэндийн даатгалтай иргэдэд эм олгохдоо хөнгөлөлт үзүүлэх эмийн үнийн дээд хязгаарт нь багтаан тогтоолд заасан үнээр үйлчилгээ үзүүлэн ажиллаж хэвшсэн дүгнэлт гарчээ.

Харин “Нийгмийн даатгалын тухай” хуулийн зарим зүйл, заалтыг зөрчсөн үйлдэл зарим эмийн сангууд илэрчээ. Баянгол дүүргийн “Хаадын тун”, “ЭНТО”, “Эм Би Би Жей”, “Бейсан”, Баянзүрх дүүргийн “Оригфарм”, Сүхбаатар дүүргийн “Тавин-Ус”, “Монос”, ‘Лхадаш хайрхан” , Сонгинохайрхан дүүргийн “Хар хорин Евро фарма”, “Арцад фарма” эмийн сангууд ажилтны хөдөлмөрийн хөлс, түүнтэй адилтгах орлогод оногдох шимтгэлийг төлдөггүй байжээ. Мөн эмийн сангийн ихэнх хувь нь эрүүл мэндийн даатгалын сангаас үнийн хөнгөлөлт үзүүлэх 134 төрлийн эмийн хангалт дутуу, эмийн үнийг дээд хязгаараас хэтрүүлэн тооцон олгосон, Эмийн санд тавигдах нийтлэг шаардлага “Хүн хүчний хангамжтай” байхаар зөвшөөрөл авсан боловч ихэнх эмийн сангуудад боловсон хүчний хангалт дутуу байсан зэрэг зөрчлүүд илэрсэн байна.

Тус хяналт шалгалтаар илэрсэн зөрчилд 16 сая төгрөгийн төлбөр, торгуулийн арга хэмжээ авч, зөрчлийг арилгуулахаар 126 заалт бүхий 32 улсын байцаагчийн хугацаатай албан шаардлага хүргүүлжээ.

Нийтэлсэн: Д.Мягмардорж

	Үнийн хөнгөлөлттэй зарах эмийг үнэтэй борлуулж байжээ
Үзсэн: 1258	Mongolian National Broadcaster

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.