Шалгалтын үеэр дараах зөрчил илэрчээ. Үүнд, “Бүти” ХХК, “Цагаан ташаа” ХХК, “Илчит металл” ХХК, “Монстрой” ХХК, “Тэсийн хурд” ХХК, “Намобридж” ХХК-иуд нь уурхай дээр байх бичиг баримтын бүрдүүлэлт дутуу, уулын ажлын тайлан төлөвлөгөөгүй, байгаль орчинд нөлөөлөх байдлын нарийвчилсан үнэлгээг батлуулаагүй зэрэг зөрчил илэрчээ. Эдгээр аж ахуйн нэгжид “Түгээмэл тархацтай ашигт малтмалын тухай” хуулийг үндэслэн зохих торгууль ногдуулж, зөрчил арилгах үүрэг өгсөн байна. 

Мөн “Баясгалант Өргөө” ХХК нь цуцлагдсан тусгай зөвшөөрлийн талбайд тусгай зөвшөөрөлгүй олборлолтын үйл ажиллагаа явуулж байжээ. Тиймээс тус компанийн үйл ажиллагааг улсын байцаагчийн актаар зогсоосон байна. Харин бичиг баримт дутуу, нөхөн сэргээлт хийгээгүй “Монстрой” ХХК, “Тэсийн хурд” ХХК, “Дабльмөнх” ХХК-иудын үйл ажиллагааг улсын байцаагчийн актаар зогсоох шийдвэр гаргажээ. Тус шалгалтын үеэр гүйцэтгэлийн хяналт шалгалтаар техникийн нөхөн сэргээлт хийж, зөрчлөө арилгасан учир “Монстрой” ХХК, “Тэсийн хурд” ХХК-ийн үйл ажиллагааг сэргээж, зөрчлөө арилгаагүй “Дабльмөнх” ХХК-ийн тусгай зөвшөөрлийг цуцлах саналыг ажлын хэсэг Нийслэлийн Засаг даргад хүргүүлсэн байна.