“КОД” хэтрүүлэгт инээдмийн уран сайхны кино тун удахгүй

Шуурхай:

“КОД” хэтрүүлэгт инээдмийн уран сайхны кино тун удахгүй

2014-11-27 17:45:19

Сүүлийн жилүүдэд манай кино урлаг хүчээ авч залуу, чадварлаг жүжигчид, найруулагчид олноор түрэн гарч байна.

Тэдний нэг болох Монгол Улсын Төрийн соёрхолт, дуучин Д.Болдын “Захиа” дууны клипээр гараагаа эхэлж, МҮОНТ-ийн “Хэцүү анги” киноны Билгүүний дүрээр үзэгчдийн эчнээ танил болсон жүжигчин М.Наранмөнх удам залгасан авьяасаа “Ахан дүүс”, “Тэнгэрийн хүү”, “Миний ах атаман” зэрэг дэлгэцийн уран бүтээлүүдэд чадварлагаар харуулаад байгаа. Тэрээр найзуудынхаа хамтаар өөрийн гэсэн продакшн байгуулжээ. Л.Ариунболд, Э.Мөнхтулга, М.Наранмөнх гэсэн залуу жүжигчид “Emerald men” продакшныг байгуулсан байна. Бүгд Соёл урлагийн их сургуулийг төгссөн мэргэжлийн уран бүтээлчид ажээ. “Emerald men” продакшн тайз, дэлгэцийн уран бүтээлийг хослуулан ажиллах төлөвлөгөөтэй байгаа талаар мэдээлж байсан тэрээр анхны уран бүтээлээ тун удахгүй хүргэх гэж байна. Тэрээр уг продакшн “Born3d film” продакшнтай хамтран бүтээсэн “КОД” нэртэй уран сайхны киногоо ирэх сарын 5-нд үзэгчдэдээ бэлэг барьж нээлтээ хийх гэж байна.

Уг киноны ерөнхий найруулагчаар залуу уран бүтээлч Л.Ариунболд, ерөнхий зураглаачаар “Born3d film” продакшны захирал н.Энхбаатар ажилласан байна. Мөн сүүлийн үеийн дэлгэцийн ашиг орлогоороо тэргүүлж байгаа кинонд олон сайхан дүр бүтээсэн залуу жүжигчин Б.Ариунцэцэг, Б.Мишээл, X-Түц продакшны жүжигчин А.Туяа “Fantastic” продакшны жүжигчин Ж.Алтаншагай, МУСТА Ө.Мөнх-Эрдэнэ нар уг кинонд дүр бүтээжээ. Харин гол дүрд Э.Мөнхтулга, М.Наранмөнх, Б.Барслхагва нар зэрэг залуу уран бүтээлчид тогложээ.

Оюутны ширээнээс л кино урлаг хэмээх айлын тогоонд чанагдаж явсан жүжигчин Л.Ариунболд хэдэн уран сайхны кино зохиол бичиж байсан удаатай ч найруулагчийн хувьд анхны бүтээл гэнэ.

Монголын кино урлагт од болон гялалзаж яваа шинэ залуу уран бүтээлчдийн бүтээсэн “КОД” хэмээх өвөрмөц содон нэртэй уран сайхны кино нь бусад кинонуудаас шинэлэг бүтээл болсон юм. Тиймээс үзэгчдийн дунд нэлээдгүй хүлээлт үүсгээд байгаа уран бүтээлийн нэг болжээ.

Нийтэлсэн: Д.Жамбалдорж

	“КОД” хэтрүүлэгт инээдмийн уран сайхны кино тун удахгүй
Үзсэн: 3590	Mongolian National Broadcaster

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.