Байгуулагдаад удаагүй байгаа Хөдөө аж ахуйг шинжлэх ухааны академи хамгийн эхний  гадаад хамтын ажиллагааныхаа эх суурийг урд хөршөөсөө эхэллээ. Хүнс хөдөө аж ахуй, хөнгөн үйлдвэрийн сайд Т.Бадамжунай, УИХ-ын гишүүн Д.Тэрбишдагва, Б.Бат-Эрдэнэ, ХАА-н ШУА-ийг төлөөлж, тус академийн ерөнхийлөгч, академич Б.Бямбаа, ХААИС-ийн сургалт эрхэлсэн проректор Б.Баасансүх тэргүүтэй хүмүүс Бүгд найрамдах Хятад ард улсын Хөдөө аж ахуйн сайдын урилгаар тус улсад айлчлаад саяхан ирлээ. Тэд Хятадын Хөдөө аж ахуйн шинжлэх ухааны академийн удирдлагатай уулзаж, Монгол улсад хүнсний ногоо тариалах, саалийн фермийн загвар аж ахуйг хөгжүүлж, хүнс, хөдөө аж ахуйн механикжуулах гэх мэт олон чиглэлээр цаашид хамтран ажиллахаар тохиролцон харилцан ойлголцлын санамж бичигт гарын үсэг зурсан байна.

Загвар фермерийн аж ахуй гэдэг нь дан ганц мах, сүүний чиглэлийн үйлдвэрлэл явуулах биш түүхий эдээрээ эцсийн бүтээгдэхүүн үйлдвэрлэж, зах зээлд нийлүүлэхээс гадна тэжээлийн ургамал тариалан боловсруулдаг байх гэнэ. Дээрх аж ахуйн үйл ажиллагааг  Хөдөө аж ахуйн их сургууль, Хөдөө аж ахуйн шинжлэх ухааны академд түшиглэн, Хүнс хөдөө аж ахуй, хөнгөн үйлдвэрийн яам, Хятадын шинжлэх ухааны академитай хамтран явуулах аж.