NBA-гийн 2014-2015 оны шинэ улирлын буюу 69 дэх улирлын зарим онцлох тоглолтын мэдээллийг хүргэж байна. Өнөөдөр зургаан тоглолт боллоо. Улирлыг хожлоороо тэргүүлж байгаа хоёр баг болох "Мемфис Гриззлис" талбай дээрээ "Голден Стэйт Уорриорс" багтай тоглолоо.

Багийнхаа түүхийг шинэчилж 16 дараалж хожоод байсан "Голден Стэйт Уорриорс" эхний үед 30-24 харьцаагаар илүүрхсэн ч сүүлийн гурван үед тэргүүллээ хадгалж чадалгүй 98-105 харьцаагаар ялагдал хүлээж улирлын гурав дахь хожигдлоо авлаа. Харин "Гриззлис" талбай дээрээ ердөө ганц л хожигдолтой бөгөөд улирлыг 20 хожил дөрвөн хожигдолтой өрнөд бүсийн хоёрт бичигдэж байна. Тус тоглолтод Марк Газол 24 оноо, 7 самбараас бөмбөг авч багаа тэргүүлсэн бол Зач Рендолф 17 оноо, 10 самбараас бөмбөг авч, Майк Конли 17, Винс Картер 16 оноог тус тус нэмэрлэжээ. Харин эсрэг багаас Клей Томпсон 22 оноо, Стивэн Карри 19 оноо, Спэйт 18 оноог авсан ч бусад тоглогч нь тааруухан тоглолт үзүүлж ялагдал хүлээлээ.