Хөдөлмөрийн сайд С.Чинзориг Төрийн жинхэнэ албан хаагчдад нэг удаагийн тусламж олгох журамд өөрчлөлт оруулах талаар энэ сарын 30-ны Засгийн газрын хуралдаанаар оруулахаар болжээ. Тэрбээр энэ талаар өнөөдөр сэтгүүлчдэд мэдээлэл хийлээ. Уг журамд төрийн албан хаагч болон төрийн жинхэнэ албан хаагчдад тэтгэвэрт гарахад нь ялгавартай хандаж байсныг болиулахаар тусгасан байна. Тодруулбал, Төрийн жинхэнэ албан хаагч төрийн албанд 25-аас дээш жил ажилласан бол 36 сарын цалинтай тэнцэх нэг удаагийн тэтгэмж авдаг. Тэгвэл төрийн албанд ажилладаг бүх хүн 12 сарын цалинтай тэнцэх мөнгөн урамшуулал авах өөрчлөлт журамд оруулж байгаа аж. Гэхдээ энэ онд тэтгэвэртээ гарах албан хаагчдын хувьд хуучин журмын дагуу тооцон урамшуулал олгох талаар тусгажээ. Мөн 13 дахь сарын цалинг тухайн албан хаагчийн нэг жилийн цалингийн дунджаар тооцон олгох аж. Хэрэв тус журам батлагдсан тохиолдолд ирэх оны нэгдүгээр сарын 1-нээс мөрдөх гэнэ.  Журмыг батласнаар төсөв, хөрөнгө хэмнэх талаасаа биш төрийн албан хаагч нартаа төр тэгш боломжийг олгох гэнэ. Тухайлбал, багш нарын хувьд төрийн жинхэнэ албан хаагч нараас ялгавартай урамшуулал авдаг байсныг халж, төрийн албанд ажиллаж байгаа бүх хүн адил урамшуулал авахаар боломжийг олгохоороо онцлогтой аж.