Тус тэмцээний алтан медалийн төлөөх тоглолт ОХУ, Канадын хоккейчдын дунд ширүүн өрсөлдөөнтэй болж энэ тоглолтод Канадчууд нэг оноогоор давамгайлснаар дэлхийн аварга боллоо. Өнгөрсөн шөнө хоёр багийн дунд өрнөсөн тоглолт  5:4 онооны харьцаагаар өндөрлөж талбайн эзэд ийнхүү хожлыг авсан. Канадчууд энэ онд түрүүлснээр дэлхийн аваргын 16 дахь алтан медалиа хүртэж байгаа. Тэдний хувьд 2005-2009 оны хооронд дараалан таван түрүү авч байсан бол 2013, 2014 оны дэлхийн аваргаас медальгүй хоцорч байжээ.

Хүрэл медалийг Словакийн хоккейчид Шведийг 4:2-оор хожиж хүртлээ. Залуучуудын Дэлхийн аварга шалгаруулах тэмцээнд 10 баг өрсөлдсөн бөгөөд багууд хоёр хэсэгт хуваагдаж, хасагдах шатанд найман баг шалгарсан. Шөвгийн наймын хамгийн сонирхолтой тоглолт АНУ-ОХУ-ын хооронд болсон бөгөөд манай хойд хөршийн хоккейчид 3:2-оор хожжээ. Харин энэ дэлхийн аваргад Германы баг 10 баг өрсөлдсөнөөс  аравдугаар байрт шалгарсан байна.