Баян-Өлгий аймгийн Бугат суманд энэ сарын 22-нд найман хүн мөнгөн усанд хордож, эмнэлэгт хүргэгдсэн талаар бид өмнө нь мэдээлсэн. Үүнтэй холбогдуулан Нийгмийн эрүүл мэндийн үндэсний төвийн Хор судлалын секторын эрхлэгч С.Өнөрсайхантай холбогдлоо. Тэрбээр “Бугат сумын иргэн Ерелан гэж 22 настай залуу гараа хаалганд хавчуулж зүссэн байсан нь идээлж зовиур үүссэнээс шалтгаалан гэрийнхэнийхээ зөвлөсөн мөнгөн усаар хийдэг уламжлалт эмчилгээг хийлгэхээр болсон юм билээ. Эмчилгээний эхний өдөр Ереланы бие зүгээр байсан. Харин гурав дахь өдрөөс хордлогын шинж илрэн аймгийн төвийн эмнэлэгт хэвтэн эмчлүүлсэн байгаа юм. Ингээд аймгийн төвөөс манайд энэ талаар мэдээлсэн. Манай мэргэжилтнүүд Баян-Өлгий аймгийн эмч нартай хамтран ажиллаад мөнгөн усны хордлого болохыг тогтоосон. Одоо тэднийг НЭМҮТ-ийн Хордлогын яаралтай тусламжийн төвд хэвтүүлэн эмчилж байгаа. Мөнгөн усны хэмжээг лабораторид тодохойлоход нэлээн өндөр тунгаар илэрсэн учраас хордлогыг устгах эм шаардлагатай болсон. Энэ эм манай улсад байхгүй учраас Эрүүл мэнд, Спортын дэд сайдаар удирдуулсан ажлын хэсэг мөнгөн усны хордлогын эсрэг эмийг ОХУ-аас захиалаад байна” гэж ярилаа.