Монголын хөлбөмбөгийн холбоо энэ онд тив, дэлхийн хэмжээний цөөнгүй тэмцээнд нас, насны ангилалд шигшээ багаа бүрдүүлэн оролцох шаардлага гараад байна.

Үүнтэй холбогдуулан МХБХ-ноос насанд хүрэгчдийн шигшээ багийн дасгалжуулагчаар С.Пүрэвсүхийг, 23 хүртэлх насны залуучуудын шигшээ багийн дасгалжуулагчаар Д.Батнасанг, 14 хүртэлх насны өсвөрийн шигшээ багийн дасгалжуулагчаар Д.Нанжидыг томиллоо.

Насанд хүрэгчдийн шигшээ баг 2018 онд ОХУ-д болох ДАШТ-ий эрхийн төлөөх Азийн бүсийн эхний шатны тоглолтыг ирэх гуравдугаар сарын 12, 17-нд хийнэ. Энэ тэмцээнд “Шар тив”-ийн 46 улсын шигшээ багийн чансаа багатай 12 нь эхний шатанд зургаан хос болон халз үзэж, ялагчид хоёрдугаар шатанд өрсөлдөх эрх авах юм.

Энэ шатны оноолтыг тодруулах сугалааны үйл ажиллагаа хоёрдугаар сарын 10-нд болох бөгөөд хоёрдугаар сагсанд багтсан манайхан нэгдүгээр сагсанд багтсан Энэтхэг, Шри-Ланк, Йемен, Камбож, Тайвань, Зүүн Тиморын аль нэг тамирчинтай оноолт таарах учиртай.

Хоёрдугаар шатанд шалгарсан 40 улсын шигшээ баг тав, таваараа найман хэсэгт хуваагдаж, энэ оны зургаадугаар сарын 11-нээс ирэх оны гуравдугаар сарын 29 хүртэл өрсөлдөнө.