Өнөөгийн байдлаар 190 мянган ахмад настан тэтгэврийн зээлтэй байгаа ба үүнд нийтдээ 355 тэрбум төгрөг эргэлдэж байдаг. Түүнчлэн ахмадууд сардаа нийт 5.3 тэрбум, жилдээ 63.9 тэрбум төгрөгийн хүүгийн орлого арилжааны банкуудад оруулж байна гэдгийг бүлгийн хуралдаанаар хэлэлцсэн асуудлын талаар танилцуулахдаа УИХ-ын гишүүн Д.Хаянхярваа хэлсэн юм.

 

Одоогийн байдлаар Нийгмийн даатгалын сангийн чөлөөт үлдэгдэл 622 тэрбум төгрөгийн 532 тэрбум нь арилжааны найман банкинд байршиж байгаа бөгөөд банкуудтай байгуулсан гэрээний хугацаа гуравдугаар сарын 24-нд гэхэд дуусгавар болно. Энэ асуудлаар Хүн амын хөгжил, нийгмийн хамгааллын яам, Нийгмийн даатгалын үндэсний зөвлөл, арилжааны банкууд ойлголцолд хүрвэл тэтгэврийн зээлийн хүүг бууруулахад нэмэлт эх үүсвэр шаардагдахгүй, Төсвийн тухай хуульд өөрчлөлт орохгүй гэж МАН-ын бүлгийн дэд дарга Н.Номтойбаяр мэдээллээ. Жишээ нь, ХААН банкны тэтгэврийн зээл олгодог үйл ажиллагааны зардал, ашиг нийлээд гурван хувиас хэтэрдэггүй аж. Тэтгэврийн зээлийн хүүг есөн хувь болгон бууруулснаар нэг ахмад настны халаасанд хамгийн багадаа 160 мянган төгрөг үлдэх боломж бүрдэх юм байна. Тиймээс Нийгмийн даатгалын сангийн хуримтлалыг тэтгэврийг зонхилж олгодог банкинд байршуулах замаар хүүг бууруулах боломжтой гэж үзсэн байна. Цаашид энэ асуудлаар нээлттэй хэлэлцүүлэг хийж, Нийгмийн даатгалын үндэсний зөвлөлд санал тавьж, шаардлагатай бол УИХ энэ чиглэлээр тодорхой шийдвэр гаргах ёстой гэж МАН-ын бүлэг үзсэн гэж МАН-ын бүлгийн дэд дарга Д.Хаянхярваа гишүүн хэллээ.

 

Мөн энэ асуудлын хүрээнд цалингийн зээлийн хүүг бууруулах боломжтой эсэхийг судалж байгаа ажээ. МАН-ын бүлгийн хувьд Өрийн удирдлагын тухай хуулийн төслийг олон талаас нь нухацтай судалж, ажлын хэсгийн санал дүгнэлтийг сонсож байж хэлэлцэх ёстой. Эхний ээлжинд өмнө нь тавьсан өрийг хэрхэн шийдэх арга замаа олох, дотоод дахь нөөц боломжоо ашиглах, бодлогын алдааг яаж засч залруулахаа ярилцах ёстой гэж бүлгийн дэд дарга Д.Хаянхярваа онцлов.