“Экспортыг дэмжиж, экспортыг орлох” бүтээгдэхүүн үйлдвэрлэлийн хоёр тэрбум төгрөгөөс илүүгүй санхүүжилт хүссэн төсөл болон Жижиг дунд үйлдвэрийг дэмжих зорилгоор олгодог бүс нутгийн чанартай зээлд хамрагдах төсөл, Орон нутагт үйлдвэрлэл хөгжүүлэх төсөл зэрэг нийт 568.1 тэрбум төгрөгийн хүсэлт бүхий 1027 төсөл ирснээс 653 төсөлд 100 тэрбум төгрөгийн санхүүжилт, “Шинэ бүтээн байгуулалт” дунд хугацааны зорилтот хөтөлбөрийн хүрээнд 348 төгрөгийн санхүүжилт хүссэн 2906 ирүүлснээс 151 төсөлд 49 тэрбум төгрөгийн хөнгөлөлттэй зээл олгожээ.

 

Одоо харин 3129 төслийн 767.1 тэрбум төгрөгийн санхүүжилт хүлээгдэж байгаа аж.  Урт хугацаатай, хүү багатай санхүүгийн дэмжлэг жижиг, дунд үйлдвэрлэл эрхлэгчдэд хэрэгтэй байгаа нь Засгийн газраас санхүүгийн эх үүсвэрийг нэмэгдүүлэх талаар тодорхой арга хэмжээ авч шийдвэрлэх зайлшгүй нөхцөл үүссэнийг харуулж байна хэмээн Засгийн газрын гишүүд үзсэн байна..

 

Иймд үйлдвэржилтийг дэмжих зорилтуудын хүрээнд экспортыг нэмэгдүүлэх, импортыг орлох бүтээгдэхүүн үйлдвэрлэлийг дэмжих, ажлын байр бий болгох зорилгоор Засгийн газраас жижиг, дунд үйлдвэрийн хөнгөлөлттэй зээлийн эх үүсвэрт шаардагдах 70 тэрбум төгрөгийн санхүүжилтийг зохих журмын дагуу шийдвэрлэхийг Хөгжлийн банкны Төлөөлөн удирдах зөвлөлд зөвшөөрчээ.

 

Хөгжлийн банкны эх үүсвэрээс олгох зээлийн хүүг есөн хувиар тооцон, холбогдох хууль тогтоомж болон “Жижиг, дунд үйлдвэрийг дэмжих зорилгоор хөнгөлөлттэй зээл олгох журам”-ын дагуу зохион байгуулж, зээлийн эргэн төлөлтийн орлогоос Хөгжлийн банкинд буцаан төвлөрүүлэх ажээ.