Нийслэлийн иргэдийн төлөөлөгчдийн хурлын тэргүүлэгчдээс авто тээврийн өөрөө явагч хэрэгслийн албан татвар төлөх журмыг баталсан байна. Ингэхдээ авто тээврийн хэрэгслийн албан татвар, төлбөр хураах ажлыг улсын дугаарын сүүлийн тооноос хамаарч төлөхөөр зохицуулсан аж. Тодруулбал, авто машины улсын дугаар:

-1, 6 гэх тоогоор төгссөн бол нэгдүгээр сард
-2, 7 гэх тоогоор төгссөн бол хоёрдугаар сард
-3, 8 гэх тоогоор төгссөн бол гуравдугаар сард
-4, 9 гэх тоогоор төгссөн бол дөрөвдүгээр сард
-5, 0 тоогоор төгссөн бол тавдугаар сард

албан татвар, төлбөр хураамжаа төлөх юм.

Өмнө нь авто машины албан татвар хураах ажлыг зургаадугаар сарын 24-нийг хүртэл хоёр үе шаттайгаар зохион байгуулдаг байсан бол энэ оноос ийнхүү нэг журмаар зохицуулахаар болжээ. Энэ талаар Нийслэлийн Татварын газрын татвар хураалтын хэлтсийн дарга Б.Ганболд “Журам хоёрдугаар сарын сүүлээр батлагдсан учраас авто машиных нь улсын дугаар “1, 2, 6, 7”-гоор төгссөн жолооч нар зургаадугаар сарын 1-ээс өмнө ямар ч торгууль төлөлгүйгээр татвар, хураамжаа төлөх боломжтой. Харин ирэх оноос энэ журмаараа явах болно. Түүнчлэн Ухаалаг Улаанбаатар хөтөлбөрийн хүрээнд “smartcar”-аар дамжуулан албан татварыг онлайн, мобайл банк зэргийг ашиглан төлж болох боломжийг нээсэн. Тэгэхээр иргэд төлбөр хураах цэгүүдэд дараалал үүсгэх шаардлаггүй болж байгаа юм” гэлээ.

Харин Нийслэлийн Авто замын газрын дарга Д.Нанзаддорж “Автотээврийн хэрэгслийн татвар, хураамжаас төвлөрсөн мөнгөн хөрөнгийг замын өргөтгөл, зам засах, чулуун зам бий болгох гэх зэрэг ажилд зарцуулдаг. Энэ жилийн хувьд Гачууртын 11 км замын шинэчлэл, Яармагийн автобусны буудлын эцсийн зогсоолыг Нисэхийн эцсийн буудалтай холбох замын ажил, Чингэлтэй- 7 буудал чиглэлийн замын өргөтгөл, Шарга морьт чиглэлийн 16,3 км замын өргөтгөл, шинэчлэлийн ажил гэх мэт ажлуудыг зохион байгуулахаар төлөвлөж байна. Түүнчлэн зургаан дүүргийн хороолол доторх зам засварын ажилд 1.5 тэрбум төгрөг, Хороо, дүүргүүдийн авто замыг камержуулахад 4.2 тэрбум төгрөг, гэрэлтүүлэг, зам засварын ажилд 5 тэрбум төгрөгийг зарцуулах тооцоо гарсан байгаа” гэв.

Энэ жил автомашины татварыг есөн дүүргийн татварын хэлтэст хурааж байгаа бол бүртгэл хийх хоёр цэг, оношлогоо хийх гурван цэг ажиллуулж байгаа аж.

Түүнчлэн нийслэлд бүртгэлтэй ч хөдөө орон нутагт байгаа том оврын авто машинууд албан татвар, агаарын бохирдлын төлбөрөө нийслэлийн татварын хэлтсийн холбогдох дансанд төлөхийг сануулав. Хэрэв заасан хугацаанд албан татвараа төлөхгүй бол журмын 4.1-д заасны дагуу захиргааны хариуцлага тооцох аж.

Дашрамд дурдхад автотээврийн хэрэгслийг албан тавар, агаарын бохирдлын төлбөр, авто зам ашигласны төлбөр төлж, албан журмын даатгалд даатгуулсны дараа техникийн үзлэгт хамруулан нэгсэн нэг наалт олгох бөгөөд энэ нь гаднаасаа уншигдах боломжтой чиптэй байх гэнэ.

Түүнчлэн автотээврийн татварын хэмжээ нэмэгдээгүй ажээ.

АТБӨЯХ-ИЙН АЛБАН ТАТВАР, АГААРЫН БОХИРДЛЫН
ТӨЛБӨР, АВТОЗАМ АШИГЛАСНЫ ТӨЛБӨР ХУРААХ
НЭГ ЦЭГИЙН ҮЙЛЧИЛГЭЭНИЙ БАЙРШИЛ