Энэ сарын 21-ний өдөр дөрвөн настай охин төрсөн эцгийнхээ гарт амиа алдсан талаарх мэдээллийн дагуу холбогдох эх сурвалжуудтай уулзаж, тодруулга авлаа. ЦЕГ-ын хувьд одоогоор хэрэг мөрдөн байцаалтын шатанд шалгагдаж байгаа тул тодорхой мэдээлэл өгөх боломжгүй гэсэн бол охины ээж “Охиноо сүүлчийн замд үдэх, хэрэгтнүүдийг цагдаагийн байгууллагаар шалгуулах” зэрэг ажил амжуулж яваа тул утсаар мэдээлэл өгөхөөс татгалзсан юм. Түүнчлэн үүнтэй холбогдуулан Хүний эрхийн үндэсний комиссийн Захиргаа хамтын ажиллагааны хэлтсийн дарга Х.Мөнхзулаас зарим зүйлийг тодруулав. Эх сурвалжуудын мэдээлж буйгаар охины аминд хүрсэн гэх аав нь БЗД-ийн II хэлтсийн шинжилгээний ажилтан байсан аж.

Охины үхлийн талаарх мэдээллийг талийгаачийн ээжийн найз цахим сүлжээнд дэлгэсэн юм. Түүний мэдээлэлд охиныг БЗД-ийн Нэгдсэн эмнэлэгт тав хоногийн турш сэхээнд байсан бөгөөд анх эмнэлэгт хүргэгдэхдээ тархинд нь цус харвасан, бүх бие нь хөхөрсөн байсан гэжээ. Түүнчлэн охиныг эмчлэгч эмч нар “Охин цус харваад 4-5 хоносон, төрсөн аав нь эмнэлэгт очиж “гомдолгүй, эмнэлэгт хэвтүүлэхгүй” гэх бичиг бичиж, гарын үсэг зураад охиныг авч явсан гэх мэт зүйлсийг ярьсан талаар ч дурдсан байна.

Охинд хүндэтгэл үзүүлэх, ээжид сэтгэлийн дэм өгөх цахим хуудсууд онлайн ертөнцөд нээгдэж байгаа бөгөөд олон хүн ээж рүү нь хүчтэй байхыг сануулсан мессеж илгээж байгаа ажээ. Мөн охинд хүндэтгэл үзүүлж, хүүхдийн эрхийн төлөө зул өргөх ёслол ирэх бямба гарагт Чингисийн талбайд болох юм.