2006 онд нээгдсэн Хя­тадын www.Google.cn сайт хаагдаж магадгүй бо­лоод байгаа тухай BBC теле­ви­зийн Шанхай дахь тусгай сурвалжлагч Крис Хогг мэдээлжээ. Дэлхийн хамгийн том хайлтын систем болох Google компани Хя­тад дахь сайтын хайлтын үр дүнд хяналт тавих тухайгаа зарлаад, Хятадын Засгийн газрын шаардлагыг цаашид биелүүлэх бодол­гүй байгаагаа албан ёсоор мэдэгдлээ.

Учир нь Хятадын зүгээс хүний эрхийг хамгаалагчдын G-mail электрон шууданг эвдэх оролдлого гарчээ. “Google” компани Хятадын Засгийн газрыг энэ хэрэгт буруушаагаагүй боловч иймэр­хүү оролдлого удаа дараалан давтагдаж байгааг батлах хангалттай нотолгоо байгаа тухай ярьсан байна. Дээрх мэдэгдлийг хийсний дараа Нью-Йорк дахь цахим худалдаанд Google’-ийн хувьцааны үнэлэмж 1.1 хувиар унажээ.

2009 онд Хятадын интернэт хайлтын зах зээлийн нийт өртөг нэг тэрбум доллар давсан удаатай. Харин энэ онд Google.cn 600 сая долларын ашиг олох боломжтой хэмээн шинжээчид таамаглаж байна. Дашрамд дуулгахад, Google сайтыг 10 сая хүн хэрэглэдэг бөгөөд өдөрт дунджаар 340.000 хүн тус сайтад нэвтэрдэг байна. Хэрвээ www.Google.cn хаагдах юм бол Хятадын Засгийн газартай хамтран ажилладаг Байду компани энэ зах зээлийн 60 хувийг хянах боломжтой болно.