Тус тэмцээнд МТСХ-ны Удирдах Зөвлөлийн гишүүн С.Дэмчигээр ахлуулсан баг, дасгалжуулагч Д.Ганбаатар, Александр Ровнягин болон Э.Нямлхагва, Б.Амарболд, Э.Энхтулга, Т.Анарсайхан, Э.Бат-Эрдэнэ нарын таван тамирчин оролцлоо.

Манай баг тамирчид 17 хүртэлх нас болон 20 хүртэлх насны эрэгтэйчүүдийн хүнд сэлмийн хувийн болон багийн төрөлд тулалдсан юм. Тэмцээнийг АНЭУ анх удаагаа зохион байгуулж байгаа.

2015 оны өсвөрийн Улсын аварга Т.Анарсайхан хэсгийн тоглолтонд Узбекистан, Сингапур, Катар, Тайвань, Саудын Арабын тамирчдыг ялж шилдэг 32-т шууд шалгарсан бөгөөд энэ шатанд Сингапурын тамирчинд ялагдаж, 19-р байр эзэллээ. Түүнийг ялсан тамирчин түрүүлжээ.

Харин өсвөрийн УАШТ-ий хошой медальт Б.Амарболд хэсгийн тоглолтод АНЭУ, Ливан, Катарын тамирчдыг ялж, шилдэг 64-т үлдсэн. Шилдэг 64-т Узбекистаны тамирчин, өнгөрсөн жилийн өсвөрийн Азийн аварга Санжар Алимовыг 15-12-оор буулган авч, шилдэг 32-т үлдлээ. Энэ шатанд Японы тамирчин Акира Коматад 15-8-аар ялагдаж, энэ төрлийн тэмцээнээ дуусгасан юм. Түүнийг ялсан япон хөвгүүн мөнгөн медаль авсан юм. Харин манай Э.Энхтулга, Э.Бат-Эрдэнэ нар нэг, нэг ялалттай тэмцээнээ дуусгажээ.

Харин 20 хүртэлх насны ангилалд Залуучуудын улсын хошой аварга Э.Нямлхагва тулалдаж, хэсгийн тоглолтондоо гурав ялан шилдэг 64-т үлдэв. Шилдэг 64-ийн шатанд Хонгконгийн тамирчинг ялж, 32-т үлдсэн ч Иракийн тамирчинд ялагдаж тэмцээнээ дуусгалаа. Энэ насны багийн төрөлд манай баг тамирчид шилдэг 16-д мөн л Иракийн багт ялагджээ.

Азийн туялзуур сэлмийн холбооноос гурван төрлийн Азийн аварга шалгаруулах тэмцээнийг зохион байгуулдаг бөгөөд энэ жилийн насанд хүрэгчдийн ААШТ Сингапур улсад долоодугаар сард, Залуучуудын аварга шалгаруулах тэмцээн Улаанбаатар хотноо болох юм. Улаанбаатарт болох тус тэмцээний өмнө Азийн туялзуур сэлмийн холбооны Удирдах зөвлөлийн хурал болон Ерөнхий ассемблей есдүгээр сарын 6, 7-ны өдөр болно.