Өнгөрөгч 2012 онд манай улс "Дэлхийн эдийн засгийн чуулган"-д оролцож ирсний дараа эх орондоо ийм эдийн засгийн чуулган хийж асуудлуудаа ярилцаж байя гэдэг санал гаргасан нь одоо уламжлал болоод зохион байгуулагдаж буйд баяртай байна гэдгийг Ерөнхийлөгч өөрийн үгэндээ онцолсон. Мөн эдийн засгийн энэхүү чуулган бол ирэх жил хүртэл манай улсын бизнес эрхлэгч, улс төрчид, Засгийн газар болон гадаадын хөрөнгө оруулагчид ямар байр суурьтай байгааг илэрхийлдэг чухал уулзалт гэсэн юм.

 

Түүнчлэн Ерөнхийлөгч Монголын үндэсний эрх ашиг гэдэг бол эх орны хөгжлөөр илэрдэг зүйл гээд эдийн засгийн таатай суурь тавигдаж байж эх орны хөгжил, улмаар үндэсний эрх ашгийн асуудал яригдана гэлээ. Өнгөрсөн 25 жилийн хугацаанд бидний олсон амжилт, сүйрэл, хийрхэлтэйгээ тэнцэж байна. Одоо бүр хасах руу явж байна. Тиймээс бид үүнийг голдрилд нь оруулах хэрэгтэй гэдгийг онцолж байлаа. Мөн тэрбээр энэ үеэр Засгийн газарт иргэдтэйгээ хамтарч баялаг бүтээх, газрыг эргэлтэд оруулах зэрэг хэд хэдэн асуудалд анхаарал хандуулахыг хүссэн юм.

 

Тэрбээр энэ үеэр нэг зүйлийг онцолж хэлсэн нь гадны улсын иргэнд таагүй хандсан аль нэг тохиолдол бол манай улсын нийт иргэдийн болон төр засгийн бодлого биш гэдгийг дэлхий дахинд ойлгуулах ёстой гээд өчигдөр Нийслэлийн Засаг дарга бөгөөд Улаанбаатар хотын захирагч Э.Бат-Үүлийн хийсэн мэдэгдлийг соёлтой хүний үйлдэл хэмээн дэмжиж байна гэсэн юм.

 

 

Үүний дараа эдийн засгийн чуулганы хоёр дахь өдрийн нэгдсэн хуралдаан эхэллээ. Өнөөдрийн нэгдсэн хуралдааны сэдэв “Монгол Улсын алсын хараа” байх бөгөөд тус хуралдааныг нээлттэй мэдлэг боловсрол сангийн тэргүүн Д.Энхбат хөтлөж Засгийн газрын тэргүүн Л.Гантөмөр, УИХ-ын гишүүн С.Бямбацогт, Академич П.Очирбат, Ардын жүжигчин Д.Сосорбарам нар оролцох юм.