Өвлийн олимпийн XXI наадам Канадын Ванкувер хотноо ирэх хоёрдугаар сарын 12- 28-ныг хүртэл үргэлжлэх цагаан олимпод манай улс гүйлтийн цанын төрөлд хоёр тамирчнаа илгээх юм. “Ванкувер-2010” өвлийн олимпийн эрхийн төлөө Монголын шигшээ багийн тамирчид гүйлтийн цана, шорт-трек, уулын цана, тэшүүрийн төрлийн урьдчилсан тэмцээнүүдэд өрсөлдсөн боловч одоогоор гүйлтийн цанын хоёр тамирчин албан ёсоор эрх хүртээд байгаа. Тодруулбал, гүйлтийн цанын төрөлд олимпийн эхний эрхийг Х.Хаш-Эрдэнэ дэлхийн аварга шалгаруулах тэмцээн болон “Дэлхийн цом”, FIS-ийн уралдаануудад оролцож, 234.97 оноо цуглуулснаар хүртсэн бол  Э.Очирсүрэн 237.10 оноогоор цагаан олимпийг зорих эрх өвөртөлсөн юм.
“Турин-2006” олимпод 15 км-т уралдаж, 99 тамирчнаас 86-д орж байсан Х.Хаш-Эрдэнийн хувьд энэ удаа мөн 15 км-т уралдана. Хоёр тамирчныг гавьяат дасгалжуулагч Л.Дорж дасгалжуулах юм. Одоогоор Монгол улсаас хоёр тамирчин өвлийн олимпийг зорих эрх өвөртлөөд байгаа ч энэ сарын 25-нд уулын цаначдын FIS-ийн эцсийн нэрсийн жагсаалтаас шалтгаалж тамирчны тоо нэмэгдэх боломжтой юм.
Ванкуверын цасан замд уралдах манай хоёр тамирчин дасгалжуулагчийн хамт ирэх сарын 6-нд эх орноосоо мордох бол ОУОХ-ны хүндэт гишүүн Ш.Магван, МҮОХ-ны ерөнхийлөгч Д.Загдсүрэн, ерөнхий нарийн бичгийн дарга Ж.Отгонцагаан, БТСГ-ын дэд дарга Д.Сүрэнхорлоо нарын албаны хүмүүс тэдний араас Ванкуверыг зорино. 
Өвлийн олимпийн пара цанын төрөлд Э.Зориг, Н.Сүхбаатар нар LW6, LW8 ангилалд 1, 5, 10 км-т уралдах эрх аваад байгаа бөгөөд манай тамирчдын тэмцээн гуравдугаар сарын дундуур болох ажээ.