Монгол Улсын шигшээ багийн тамирчин Тунгалагийн Санчир Азийн томоохон спорт холбоодын нэг Филиппиний сагсан бөмбөгийн мэргэжлийн Лиг болох PBA-гийн "Хинебра Барангая" багтай гэрээ хийгээд байсан. Тэгвэл манай тамирчны гэрээг цуцлаж, түүний оронд БНСУ-ын хамгаалагч Живон Кимийг авч байгаа юм байна. Солонгос хамгаалагч Живон Ким 2014-2015 оны улиралд 5.09 оноо, 1.87 самбараас бөмбөг авч, 2.24 оновчтой дамжуулалт дундчилсан байна.

Харин Т.Санчирын хувьд "Хинебра Барангая"-д байх багахан хугацаандаа дөрвөн тоглолтод оролцож, 4.5 оноо,1.0 самбар бөмбөг авч,1.75 бөмбөг алдалт гэсэн үзүүлэлттэй байжээ. Түүний хамгийн сүүлд “Киа Карнавал” багийн эсрэг сэлгээнээс гарч тоглосон тоглолтын үр дүн муу байснаас ийм шийдвэрт хүрэхэд нөлөөлсөн гэж эх сурвалжууд үзэж байна. 

Мөн Азийн шилдэг тоглогч Т.Санчир "Ямар ч байсан чадах бүхнээ хийлээ. Надад боломж олгохыг дасгалжуулагч анхнаасаа хүсээгүй. Гэхдээ энэ асуудлыг би өөрийн зүгээс тавьсан. Эвтэйхэн байдлаар ярилцаад өнөөдөр /V.31/ шийдлээ. Хэлний тал дээр нэг ч асуудал гарсангүй. Учир нь сагсан бөмбөг нэг л хэлтэй болохоор. Дэмжиж ирсэн бүх хүмүүстээ баярлалаа. Их туршлага боллоо” хэмээн өөрийн цахим хуудаснаа бичжээ.