Өнгөрсөн даваа гарагт УИХ дахь АН-ын бүлгийн хуралдаанаар “МАН-тай Засгийн газарт хамтрахад байгуулсан “Харилцан итгэлцэл, хамтын ажиллагааны гэрээ”-ий талаар хэлэлцсэн. Ингэхэд гишүүдийн олонх нь МАН-тай хамтарсан гэрээгээ эргэн харах цаг болсон гэдэгт санал нийлж байгаа гэсэн юм. Түүнчлэн МАН Засгийн газарт хамтарч ажиллаж байгаа хэрнээ “Бид хамтдаа” гэсэн аяныг өрнүүлж, Засгийн газраа муулж, мөрийн хөтөлбөрийн биелэлт нь хангалтгүй байна хэмээн мэдэгдэж байгаа нь анхаарал татаж байгаа гэдгийг АН-ын бүлгийн дарга Б.Гарамгайбаатар хэлж байсан юм. Түүнчлэн намын гишүүд МАН Засгийн газарт хамтарч орсноосоо хойш өнөөдрийг хүртэл зөвхөн албан тушаалын хуваарилалт дээр л онцгой анхаарч байна хэмээн үзсэн байна. Тиймээс Засгийн газар хамтарч ажиллахдаа байгуулсан гэрээний биелэлтийг дүгнэхийг бүлэгт даалгажээ.

 

Ардчилсан намын Гүйцэтгэх зөвлөлөөс гаргасан тогтоолд улс төрийн намуудтай байгуулсан гэрээний биелэлтийг дүгнэх хэмээн бичсэн хэдий ч энэ нь хамтарсан намууд дунд олонхийг бүрдүүлж байгаа МАН-д хамааралтай асуудал гэдгийг эх сурвалжууд хэллээ.