Улсын баяр наадам хаяанд ирж наадмын яриа чих дэлсэж эхлэв. Бөхийн бүлийнхний дунд өрнөсөн халуун яриа өнгөрөгч долоо хоногт Монгол Улсын Дархан аварга А.Сүхбат зурагтаар ярилцлага өгснөөс үүдэн эхэлсэн гэж болно. 

Энэ үеэр түүний хувьд баяр наадамдаа зодоглоно гэдгээ хэлээд миний бие зүүний манлайд гарах учиртай гэдгийг үзэгч олонд тайлбарлаж, энэ жил урд жилийнх шиг зүлэг ногоон дэвжээ, ард түмнээ үл хүндэтгэсэн асуудал гарахгүй гэдэгт итгэж байна гэсэн юм. 

Нэг зарлигаар Монгол Улсын Дархан аварга цолыг хүртсэн хоёр залуу аварга зүүний манлайг булаалдсан нь өнгөрсөн жилийн наадмын бөхийн уур амьсгалыг эвдсэн. Тэдний маргааныг Ерөнхийлөгчийн Тамгын газар, Үндэсний бөхийн холбоо шийдэж чадахгүй, хоёр байгууллага эсрэг шийдвэр гаргаад байгаа. Тодруулбал, Бөхийн холбоо МУДА Г.Өсөхбаярыг, зарлиг гаргасан Тамгын газар МУДА А.Сүхбатыг зүүнийг манлайлж, эхэлж ам авна гэжээ.

Харин МҮБХ-ны зүгээс хоёр аваргын хэн нь эхэлж ам авахыг мөн л шийдэж чадахгүй байгаа тул Баяр наадам зохион байгуулах хороонд хандсан байна. Гэвч Баяр наадам зохион байгуулах хорооноос манай шийдэх асуудал биш гэжээ.

Хоёр аваргын хувьд үзүүлсэн амжилтыг шалгуур болговол Г.Өсөхбаяр аварга эхэлж ам авна. Харин хэн нь түрүүлж аварга цолны болзол хангасан болон цол авсан тушаалын дугаар зэргийг харгалзвал А.Сүхбат аварга эхэлж ам авах учиртай.

Энэхүү маргааны гол буруутан нь эцэстээ баримт бичиг, дүрмийн тогтсон заалтыг хангуулаагүй, бөхийн цолыг цаг тухайд нь олгоогүй  МҮБХ болон улс төрийн үзэл санаатай зарим шийдвэр гаргагчидтай холбоотой гэж бөхийн хүрээнийхэн үзээд байгаа.

Түүнчлэн хоёр аваргын хэн нэгнийг дур мэдэн зүүнийг манлайлуулах нь тэдний нутаг ус, дэвжээ, дэмжигчдийг талцуулсан асуудал болох тул маргааныг аливаа туйлшралгүйгээр шийдэх хэрэгтэйг бөхийн зарим мэргэжилтнүүд хэлж байгаа юм.