Тулгар төрийн 2224, Их Монгол Улсын 809, Ардын хувьсгалын 94 жилийн ой, Үндэсний их баяр наадмаар иргэд нийтдээ тав хоног амарна.

Өмнө нь  Нийтээр тэмдэглэх баярын болон тэмдэглэлт өдрүүдийн тухай хуулиар Үндэсний их баяр наадам, Ардын хувьсгалын ойн баярыг жил бүрийн долоодугаар сарын 11, 12, 13-ны өдөр нийтээр амарч, баяр болгон тэмдэглэхээр хуульчилсан байсан. Гэвч эдгээр баярын өдрүүд нь Хөдөлмөрийн тухай хуульд заасан долоо хоногийн амралтын өдрүүдтэй буюу бямба, ням гарагт давхацсан тохиолдолд нөхөж амрах эрх зүйн зохицуулалт байгаагүй юм. Тиймээс өнгөрсөн жил Засгийн газраас Үндэсний их баяр наадмаар бүх нийтээр амарч, тэмдэглэн өнгөрүүлэх гурван өдрийг тав болгож, улс орны хэмжээнд нийтээр амрахаар хуулийн төсөл боловсруулж улмаар УИХ-аар баталж байсан юм. Ингэснээр өнгөрсөн жилийн долоодугаар сарын  12, 13-ны өдрүүдэд бямба, ням гараг таарсныг нь нөхөж нийтдээ тав хоног амарч байсан юм. Өөрөөр хэлбэл хуульд жил  бүрийн долоодугаар сарын 11-15-ны хооронд Үндэсний их баяр наадам, Ардын хувьсгалын ойн баярыг нийтээр тэмдэглэж амардаг болсон.

Энэ жилийн тухайд баяр наадмаар иргэд хуулийн дагуу долоодугаар сарын 11-ний бямба гарагаас 15-ны лхагва гараг хүртэл нийтдээ тав хоног амарна.