Монгол Улсын Шадар сайдын баталсан “Хүн ам олноор төвлөрсөн үзвэр үйлчилгээ, үйлдвэрлэл, худалдааны байгууллага”-уудад гамшгаас хамгаалах болон гал түймрийн улсын хяналтыг хэрэгжүүлэх шалгалтаар дараах газруудад ноцтой зөрчил илэрчээ.

Тодруулбал,

• Баянгол дүүргийн 3 дугаар хороо “Барс Импекс” ХХК-ийн Барс-1 худалдааны төв нь холбогдох байгууллагын зөвшөөрөлгүйгээр барилга барьсан, өргөтгөл хийсэн.

• Баянгол дүүргийн 20 дугаар хороо МВС групп ХХК-ний Барс-2 худалдааны төв нь улсын комисс байнгын ашиглалтад хүлээж аваагүй барилга байгууламжид үйл ажиллагаа явуулсан, барилга байгууламжийн хийц бүтээцийн шийдэл  нь гал түймэр гарсан тохиолдолд хүн амын аюулгүй байдлыг хангахуйц, гал түймрийг бага хохиролтойгоор унтраах бололцоог хангаагүй, цахилгааны аюулгүй байдал хангагдаагүй.

• Баянзүрх дүүргийн 6 дугаар хороо “Хан талст” ХХК-ийн Баянзүрх худалдааны төв нь зам гарц нарийсгаж, гарцан дээр эд зүйл байрлуулсан, авралтын нөөц гарц хаасан, цахилгааны аюулгүй байдал хангагдаагүй байна. Эдгээр газруудад зөрчлөө арилгах олон удаагийн албан бичгийг өгсөн ч өнөөдрийг хүртэл эрсдэлтэй хэвээр ажилласаар байгаа юм. Тиймээс дээрхи захуудад  Нийслэлийн Онцгой байдлын газраас үйл ажиллагааг нь зогсоох тогтоолыг хүргүүлжээ.