Хууль хэрэгжиж эхэлбэл хорих ангаас 1700 орчим хүн суллагдана гэдгийг албаныхан хэлсэн. Энгийнээр хэлбэл, Өршөөлийн хуульд хамрагдаж суллагдах эдгээр хүн бол төрийн "зөөлөн" нүүрийг үзэж хоёр дахь боломжоо эдлэхээр гарч ирэх хүмүүс.

 

Ерөнхийлөгч нэгэнт авлига болон төрийн албан тушаалын гэмт хэрэгтнүүдийг өршөөхгүй хэмээн хуульд хэсэгчлэн хориг тавьсан. Хоригийг нь ч УИХ хүлээн авсан. Харин одоо хүлээн авсан хоригоо хурдан хэлэлцэх л үлдээд байна.

Өчигдөр УИХ-ын намрын ээлжит чуулган нээлтээ хийсний дараа Хууль зүйн байнгын хороо цаг сунган хуралдаж, Өршөөл үзүүлэх тухай хуульд нэмэлт өөрчлөлт оруулах тухай хуулийн төслийн анхны хэлэлцүүлгийг хийсэн. Байнгын хорооны хурал дээр УИХ дахь МАН-ын бүлэг “Хуулийн төслийн хэлэлцүүлгийг хурдлуулъя гэдэгт санал нэгдсэн” гэдгийг албан бус эх сурвалжууд мэдээлж байна.

 

Харин өнөө өглөө чуулганы хуралдааны үеэр МАН-ын бүлэг тав хоногийн завсарлага авлаа. Ингэж завсарлага авах болсон шалтгаанаа МАН-ын бүлгийн дарга С.Бямбацогт “Ээлжит бус чуулганаар Өршөөлийн хуульд тавьсан хоригийг хэлэлцээд авлига, албан тушаалын гэмт хэргийг өршөөлд хамруулахгүй гээд 49 гишүүн саналаа өгсөн. Тийм учраас энэ зарчим алдагдах ёсгүй. Дээрээс нь өнөөдрийн чуулганы нэгдсэн хуралдаанд Хууль зүйн байнгын хороогоор хэлэлцсэн Өршөөл үзүүлэх тухай хуульд өөрчлөлт оруулах төсөлтэй холбоотой материал тараагдаагүй байна. Энэ асуудлыг нухацтай хэлэлцэх шаардлага байна. Тэгээд ч Хууль зүйн байнгын хороо өчигдөр орой хуралдах үеэр будлианууд их гарсан” гэсэн юм. Цөөнх гэдгийг УИХ-д оруулж ирсэн хууль бүрийг эсэргүүцэх ёстой гээд ойлгочихсон уу, бүү мэд. Ямартай ч МАН-ын бүлгээс нийгэмд чухалд тооцогдох хуулийн төслүүдийг хэлэлцэх бүрт завсарлага авч гацаадаг нь харамсалтай.

 

МАН-ын бүлгийг ингэж завсарлага авах үед Хууль зүйн байнгын хорооны дарга Д.Ганбат “Хэдхэн хоногийн өмнө матрын нулимс унагаад л өчнөөн хүн хүлээж байна гээд байсан. Одоо болохоор ямар нэг шалтаг олоод хойшлуулах гэх. Хууль зүйн байнгын хороо 20.00 цаг хүртэл хуралдаж, асуудлаа ярьсан. Өвөл болж байна. Хүмүүсээ чөлөөлье. С.Бямбацогтоо чи шахалт дарамтад ороод байгаа юм уу. Хэдүүлээ ажлаа хийе л дээ” гэж хэлсэн нь олон хүний анхаарлыг татлаа.

 

Үнэхээр л шалтаг төдий гэлтэй. Чуулганы хуралдаанд бүлгийн дарга нь үг хэлэхдээ уянгалуулдаг шигээ ард түмэндээ хайртай бол тэднийг хүлээлгэж байгаа нэг ч гэсэн хуулийн төслийг хурдан хэлэлцэх нь зүйтэй болов уу. Үгүй гэвэл “эдийн засаг тартагтаа тултлаа хямарчихлаа” гэж байнга үглэдэг бүлгийн гишүүд нь улсаас өдөрт нэг хоригдолд зарцуулдаг 10 мянга орчим төгрөгийг ч мөн хэмнэх хэрэгтэй гэж бодмоор юм.

 

Намрын чуулган дөнгөж эхэлсэн өдрөөс хамгийн чухалд тооцогдох хуулийн төслийг хэлэлцэхийг “гацааж” эхэлчихээд чуулганы төгсгөлд “хуралдсан тэд хоногийнхоо хугацаанд УИХ ердөө л хэдхэн хуулийн төсөл хэлэлцсэн байна” гээд шүүмжилнэ. Цөөнх гэдэг чинь эсрэг тал биш шүү дээ. Өршөөлийн хуулиа хурдан хэлэлцээсэй. Ард түмэн хүлээж байна.