“ФС Улаанбаатар” Хүрхрээ үндэсний дээд лигт эцсийн мөчид ялалт байгуулж чадсанаар 2-р байрыг эзлэн 30 сая төгрөгийн эзэд болоод байсан. Мөн О.Баяржаргалын хувьд лигийн шилдэг хагас хамгаалагч болж 2 сая төгрөгийг гардан аваад байлаа. Өөрөөр хэлбэл, тэд юм юмны захаас хүртээд байсан. Харин “Унаганууд” багийн тухайд цомын төлөө дайралтаа хийхээс өөр арга байгаагүй юм. Гэхдээ эхний гоолыг 7 дахь минутад Эрдэнэбаатар оруулж тоглолтыг тэргүүлж эхэлсэн. Үүнээс хойш “Улаанбаатарын унаганууд” баг хүчтэй довтолж бөмбөг эзэмшилт илүү болж ирсэн. Улмаар Түмэнжаргалын дамжуулалтаар Ганзориг 3 минутын дотор 2 гоолыг оруулснаар тэд анх удаа тоглолтыг тэргүүлж чадсан.

Харин Ганзоригийн тэргүүллийг эхний хагасын төгсгөлд хамгаалагч Ганбат үгүй хийсэн юм. Чөлөөт цохилтоос ирсэн бөмбөг түүнээс хачир аван хаалганд орсноор тооны харьцаа 2:2 болон тэнцсэн. Сонирхолтой болсон тоглолтын 2-р хагас харин тамирчдын хоорондын хурц тэмцлээр эхэлж олон ч карт өргөгдлөө. 54 дэх минутанд “ФС Улаанбаатар” багаас Э.Мөнх-Эрдэнэ багтаа тун чухал гоолыг авчирч чадлаа. Мөн эсрэг багийн болж байсан тоглолтыг ч эвдэж чадсан. Энэ тоглолтын эцсийн цэгийг сэлгээгээр орж ирсэн Шояа Ёокояама оруулснаар 4:2 харьцаатай “ФС Улаанбаатар” ялалт байгуулж цомын шигшээ тоглолтод шалгарч үлдлээ.