Олон улсын валютын сан өр төлбөрөө зохих хугацаанд нь барагдуулаагүй орнуудад нэмж зээл олгох эсэх тухай бодлогодоо өөрчлөлт хийлээ. Өмнө нь энэ мэт орнуудад зээл олгох асуудлаар тус байгууллага илүү хатуу байр суурь баримталдаг байсан юм.

Харин өчигдөр Олон улсын валютын сангийн гүйцэтгэх зөвлөлийн уулзалтаар өр төлбөртэй орнуудад зээл тусламж олгоход нааштай хандахаар болсон байна. Ингэснээр энэ оны эцсээр Украйн улс ОХУ-д төлөх ёстой 3 сая америк долларын өрөө барагдуулж дуусаагүй байлаа ч Олон улсын валютын сангаас үргэлжлүүлэн зээл тусламж авах эрхийг нээж байна.

Үүнтэй холбогдуулан Оросын Сангийн сайд Антон Силуанов сэтгүүлчдэд мэдэгдэл хийж, Олон улсын валютын сангийн энэ шийдвэр Киевийн Засгийн газарт өр төлбөрөө барагдуулахгүй байх эрх олгосон хэрэг боллоо гэж шүүмжилсэн байна. Орос Украйны өрийн асуудлаарх хэлэлцээ төдийлөн үр дүнгүй байгаа. Иймээс Орос улс зээлдүүлэгчийн хувиар эрхээ хамгаалуулахын тулд шүүхэд хандахаар зэхэж байна гэдгийг ОХУ-ын Сангийн сайд мөн мэдэгдсэн байна.