Үндэсний супер лигийн энэ улирлын нэгдүгээр тойргийн хамгийн сүүлчийн тоглолт "Баянгол Сентоза Ирвэсүүд", "Альяанс-Тех Харцага" багийн хооронд боллоо. Багийн ахлагч Г.Баттөр болон Steve Pledger  нар ирснээр Харцагууд тун сайн тоглолтыг үзүүлээд байгаа билээ.

Гэсэн ч тэд энэ удаад дахин  хожигдлоо. Улмаар улирлын эхний тойргийг 2:5 гэсэн муу амжилттай өндөрлүүлж байна. Тэдний хожигдсон гол шалтгаан сэлгээний тоглогчид байсан юм. Гараанд гарсан таван тоглогч бүгд 10-аас дээш оноо авсан ч сэлгээнээс нэг ч тоглогч оноо авсангүй.

Steve Pledger 32 оноо авч ээлжит сайн тоглолтоо үргэлжлүүлсэн бол П.Болортулга 24 оноо, 20 самбараас бөмбөг авалт, Г.Баттөр 18 оноо, 8 оновчтой дамжуулалт, найман самбараас бөмбөг авалт, Teeng Akol 12 оноо, 16 самбараас бөмбөг авалт, Г.Цэнгүүнбаяр 18 оноо авж тус тус сайн тоглолтоо үзүүлсэн ч тэд сэлгээний тоглогчдоо ашиглаж чадсангүй.

Харин "Сентоза Ирвэсүүд" ээлжит сайн тоглолтоо үзүүлж улирлын тав дахь хожлоо авлаа. Т.Санчир шийдвэрлэх үед сайн тоглолт үзүүлж багийнхаа оноо авалтыг явуулж байсан бол Э.Дорж-Арилд шийдвэрлэх үед маш чухал самбараас бөмбөг авалтыг хоёр ч удаа гүйцэтгэж торгуулийн шидэлтээ амжилттай болгосноор багаа хожилд хөтөллөө.

Т.Санчир 38 оноо, 16 самбараас бөмбөг авалт гүйцэтгэж багаа тэргүүлсэн бол Э.Дорж-Арилд 21 оноо, 6 оновчтой дамжуулалт, 7 самбараас бөмбөг авалт, Dylan Brewer 18 оноо, Э.Цэвэлдорж 13 оноо гүйцэтгэж багаа тэргүүлснээр улирлын тав дахь хожлоо авч тэд хүснэгтийг дахин тэргүүлж эхэллээ.