Вашингтон Өмнөд Солонгос дахь цэргийн оролцоогоо нэмэгдүүлж магадгүй байна. Солонгосын хойгт америкийн цэргийн хүчин болон стратегийн зориулалттай хэрэгслүүдийг байрлуулах асуудлаар Сөүл, Вашингтон хоёр хэлэлцээ хийж байгаа талаар Өмнөд Солонгосын батлан хамгаалах яамны төлөөлөгч Ройтерс агентлагт мэдээлсэн байна.

Гэхдээ тэр төлөөлөгч чухам ямар стратегийн хүчний талаар яригдаж байгааг тодотгоогүй байна. Үүний өмнө буюу лхагва гарагт Умард Солонгос түүхэндээ анх удаа устөрөгчийн бөмбөг амжилттай туршсан тухайгаа зарласан юм. Орос, АНУ зэрэг олон улс орон Пхеньяны энэ мэдэгдэлд эргэлзэнгүй хандаж байгаа боловч Умардтай хөрш зэргэлдээ Өмнөд Солонгос, Япон улсууд энэ мэдээллийг тун эмзэг хүлээн авч байна.

Үүний зэрэгцээ Өмнөд Солонгосын батлан хамгаалахын сайд Хан Мин Гу өчигдөр парламентын депутатуудад мэдээлэл хийх үедээ, Умард Солонгосын чигт байрлуулсан чанга яригчуудаар суртал ухуулгын мэдээлэл дамжуулах ажлыг сэргээж магадгүй гэдгийг мэдэгдсэн байна. Хоёр Солонгосыг тусгаарласан цэрэггүй бүсийн дагуу Өмнөдийн талаас чанга яригчаар мэдээлэл цацдагаас болж өнгөрсөн онд хоёр улсын дундах хил дээр түгшүүртэй байдал хурцдаж, улмаар хоёр талын зөвшилцлийн дагуу уг нэвтрүүлгийг зогсоосон юм.