Хятадын эдийн засаг 2015 онд 6.9 хувиар өсчээ. Энэ нь тус улсын хувьд 1990 оноос хойших буюу сүүлийн 25 жилийн хамгийн доод үзүүлэлтэд тооцогдож байна. БНХАУ-ын статистикийн газраас өнөөдөр энэ тухай мэдээллээ. 2015 оны дөрөвдүгээр улиралд Хятад улсын эдийн засгийн өсөлтийн хурдац 6.8 хувиар буурсныг мөн энд өгүүлсэн байна. Одоогийн байдлаар манай урд хөрш үндэсний эдийн засгийн өсөлтөө алгуур удаашруулах бодлого барьж байгаа. 2010 онд тус улсын эдийн засгийн өсөлт 10.4 хувьтай байсан нь 2011 онд 9.2 хувь, 2012 онд 7.8 хувь болж тус тус буурсан юм. Харин өнгөрөгч оны тухайд өсөлтөө долоон хувьд барина гэсэн тооцооллыг Хятадын Засгийн газар хийж байсан. Тус улсын эдийн засгийн өсөлт ийнхүү удаашрах болсон нь хөгжлийн загвартаа өөрчлөлт оруулж, үйлдвэрлэл, хөрөнгө оруулалтаас хэрэглээ, үйлчилгээний салбарт тулгуурлах бодлого түлхүү баримтлах болсонтой холбоотой гэж шинжээчид тайлбарлаж байна. Түүнээс гадна өнгөрсөн онд Хятадын гадаад худалдаа жилийн дүнгээрээ долоон хувиар буурч, 24.59 их наяд юань буюу 3.8 их наяд америк доллар болсон байна. Түүнчлэн Хятадын үйлчилгээний салбарын эзлэх хувь түүхэндээ анх удаа тус улсын ДНБ-ий талаас давж, 50.5 хувьд хүрчээ.