Говь-Алтай аймгийн Шарга, Хүйсийн говийн нутгаар цочир хүйтэрч, цас нэлээд зузаан болсноос хар сүүлт зээр, монгол бөхөн зэрэг амьтад идэш тэжээлгүйдэж хорогджээ. Тус аймгийн Байгаль орчин, аялал жуулчлалын газрын дөрвөн ажилтан Шарга, Хүйсийн говийн нутгаар нэгдүгээр сарын 28-31-нд явж, нөхцөл байдалтай танилцсан байна.

Энэ үеэр өдөртөө 25-30, шөнөдөө 40-46 хэм хүрч хүйтэрч, цасны зузаан сүүлийн таван жилийн дунджаас 2-3 дахин их буюу 14-17 см-т хүрчээ. Мэргэжилтний ярьснаар хар сүүлт зээр, бөхөн зэрэг амьтад айлын хот бараадан үхсэн байсан гэнэ. Үүнтэй холбогдуулан орон нутгийн удирдлага, Дэлхийн байгаль хамгаалах сангийн төлөөлөгчид яаралтай арга хэмжээ авахаар ажиллаж байгаа аж.