Сар шинийн баярыг угтан нийслэлийн Авто замын хөдөлгөөний ачааллыг бууруулах зорилгоор  хэрэгжүүлж буй дугаарын хязгаарлалт  ирэх амралтын өдрүүдэд үргэлжлүүлэн мөрдөгдөнө. Тодруулбал, 2016 оны хоёрдугаар сарын 06-ны Бямба гарагт автомашины улсын дугаарын сүүлчийн орон сондгой тоогоор төгссөн, хоёрдугаар сарын 07-ны Ням гарагт автомашины улсын дугаарын сүүлчийн орон тэгш тоогоор төгссөн авто тээврийн хэрэгслийг дугаарын хязгаарлалтын бүс, Сонгинохайрхан дүүргийн Саппорагийн уулзвараас Таван шарын уулзвар хүртэлх замд 10:00-20:00 цагийн хооронд авто замын хөдөлгөөнд оролцохыг хязгаарлана.

Үүнтэй холбогдуулан тодорхой суурьшлын цэгүүдээс "Нарантуул" худалдааны төв рүү нийт 11 их багтаамжийн автобус 10:00, 12:30, 15:00 цагуудад үйлчилнэ. Мөн тухайн өдрүүдэд Чингисийн талбай болон "Дүнжингарав" худалдааны төвөөс "Хүннү молл" худалдааны төв чиглэлд хоёр их багтаамжийн автобус 10:00, 12:30, 15:00 цагуудад үйлчилгээ үзүүлнэ. Мөн хотын захын алслагдсан чиглэлүүдэд 4 аж ахуйн нэгжийн 20 бага багтаамжийн микроавтобусаар захиалгат үйлчилгээг зохион байгуулна. Захиалгыг 11-326352, 11-323176 утсанд хандаж өгөх боломжтой. Нийслэл хот дотор такси үйлчилгээнд 14 аж ахуйн нэгжийн 497 тээврийн хэрэгсэл үйлчилгээнд ажиллана.