Баян-Өлгий аймгийн "13 настай бүргэдчин" хэмээх Н.Айшолпан өнгөрөгч сард "The Eagle Huntress" киноныхоо нээлтэд оролцсон талаар бид өмнө нь мэдээлж байсан. Түүний тоглосон киног Холливудын одод сурталчилж, охины нэр хүнд дэлхий дахинаа хурдацтай өсч байна. Тэгвэл энэ удаад фэйсбүүкийн хамгийн олон хандалттай “Хүчирхэг охид” хуудсанд Н.Айшолпан охины талаарх дэлгэрэнгүй мэдээлэл гарчээ. Энэхүү хуудсын хувьд өдөр бүр хүчирхэг эмэгтэйчүүд, амжилттай яваа охидын талаар өгүүлдэг юм. Охины өмнө Грэммийн наадмаас хэд хэдэн шагналыг хүртэж, шилдгийн шилдэг болсон Тэйлор Свифтийг онцолсон бол өнөөдөр Монгол охиныг магтан бичжээ.

Нийтлэлд “13-хан настай хэрнээ эрчүүдийн хийдэг зүйлийг хийж, бүргэд сургадаг Монголын цорын ганц алдартай охин” хэмээн онцлон бичээд бүргэдчин болсон талаарх сонирхолтой баримтыг дурдсан байна.