Дорнод аймаг математикийн сургалтаараа 2015 онд тэргүүлж, Элсэлтийн ерөнхий шалгалтын дүнгээр улсад нэгдүгээрт орсон. Тэгвэл тус аймгийн сурагчид нэг хичээлийн жилд математикийн найман олимпиадад ордог байна. Хичээлийн шинэ улирал эхлэхэд "Гарааны олимпиад"-д оролцсоноор тухайн жилийн тэмцээн эхлэх ба энэ нь 25 дахь жилдээ уламжлал болон зохион байгуулагджээ.

Түүнчлэн "Геометрийн олимпиад", "Математикийн цаг" сонины олимпиад зэрэг найман тэмцээнд сурагчид ур чадвараа сорьдог юм. Мөн "Олон улсын "Кенгуру" математикийн олимпиадад Дорнод аймгийн сурагчдын 70 хувь нь оролцож, хичээлийн жилийн төгсгөлд Улсын олимпиадад оролцдог" гэж Аймгийн Боловсрол, соёлын газрын мэргэжилтэн Н.Бямбаханд онцоллоо.