09.30 цагт: Хүнс, хөдөө аж ахуйн салбарын удирдах ажилтны зөвлөгөөн ХХААЯ-ны 1 дүгээр давхрын хурлын зааланд болно. Зөвлөгөөнд аймгуудын Хүнс, хөдөө аж ахуйн газрын Мал аж ахуй, Газар тариалан, Хүнс, Мал эмнэлгийн хэлтсийн дарга нар оролцоно. Утас: 99072224, 95950015

10.00 цагт: Европын Холбооны Гадаад харилцааны албаны АСЕМ-ын асуудал хариуцсан Ахлах зөвлөх Майкл Мэтиссэн Гадаад Хэргийн яамны "Зөвшилцөл" танхимд сэтгүүлчдэд мэдээлэл хийнэ. Утас: 88080619, 89010515

10.00 цагт: Чингэлтэй дүүргийн Онцгой байдлын хэлтэс, Дэлхийн зөн олон улсын байгууллага, Дүүргийн улаан загалмайн хороотой хамтран Ерөнхий боловсролын 17, 37 дугаар сургуулийн хүүхдүүдийн дунд Гамшгаас хамгаалах, галын аюулаас урьдчилан сэргийлэх танхимын сургалтыг зохион байгуулна. Утас:96602269

10.00 цагт: Гадаргын усыг хуримтлуулан унданд ашиглах зориулалтаар баригдахаар төлөвлөж буй "Туул усан цогцолбор"-ын Техник эдийн засгийн үндэслэлийг хэлэлцэх хурал "Чингис зочид" буудлын 3 давхарт болно. Утас 99121618, 99098012

10.30 цагт: Нээлттэй Засгийн түншлэлийн үндэсний зөвлөлийн хуралдаанд ЗГХЭГ-ын дарга С.Баярцогт оролцоно. Хурал “Пума Империал” зочид буудлын 2 давхрын хурлын танхимд болно.

11.00 цагт: Норвегийн Лиллехаммер хотноо хоёрдугаар сарын 12-21-ний өдөр зохиогдсон Залуучуудын өвлийн II олимпийн гүйлтийн тэшүүрийн төрөлд алтан медаль хүртсэн Б.Сумъяаг хүлээн авч, шагнал гардуулах арга хэмжээ  ЭМСЯ-ны 204 тоотод  болно. Утас: 86885060

11.00 цагт:  МАН, МАХН-ын хамтарсан хэвлэлийн бага хурал Төрийн ордон дахь "Жанжин Д.Сүхбаатар" танхимд болно.

11.00 цагт: Хууль тогтоох байгууллага, гүйцэтгэх засаглал, хууль хэрэгжүүлэх байгууллага болон бусад Төрийн байгууллагууд "Хадгаламж зээлийн хоршоо"-ны хохирогчдыг хууран мэхэлж байгаа талаар Хүний эрхийн хяналтын хороо болон хохирогчдын төлөөлөл нотлох баримт дэлгэж Хэвлэлийн Хүрээлэнд мэдээлэл хийнэ.

11.00 цагт: Иргэн А.Одончимэг намуудын санхүүжилтийн асуудлаар "Зууны мэдээ" сонины Үндэсний мэдээллийн төвд мэдээлэл хийнэ.

11.30 цагт: Нийслэлийн ЗДТГ-ын Б танхимд Баянзүрх, Сонсголонгийн гүүр барихтай холбоотой асуудлаар нийслэлийн Авто замын газрын дарга Д.Нанзаддорж хэвлэлийн хурал зарлалаа.

12.00 цагт: "Сайдын цаг" уулзалтад Сангийн сайд Б.Болор, ГТЕГ-ын дарга С.Пүрэв нар оролцож, Эдийн засгийн ил тод байдлыг дэмжих тухай хуулийн хэрэгжилтийн талаар мэдээлэл хийж, сэтгүүлчдийн асуултад хариулна.

17.00 цагт: “Элгээ чөлөөлье” уулзалт МЗХ-ны “Залуус” танхимд болно. Энэ үеэр элэгний өвчлөлийн үүсэх шалтгаан, архидалтын хор хөнөөлийн талаар МЗХ-ны эрүүл мэндийн байнгын хороон дарга Ж.Амарсанаа “Элгээ хамгаалъя” илтгэл лекц танилцуулах юм. Мөн Анагаах ухааны доктор, МЗХ-ны эрүүл мэндийн байнгын хорооны удирдах зөвлөлийн гишүүн Б.Баянмөнх “Хоол, хүнсний зохилдлого”, МЗХ-ны эрүүл мэндийн байнгын хорооны дэд дарга Х.Бат-Ирээдүй “Ирээдүйдээ илгээх дархлаа” сэдвээр лекц уншиж, залуустай нээлттэй ярилцана.

18.30 цагт: Монголын Урлагийн Зөвлөл (МУЗ)-өөс Канадын Элчин Сайдын Яамны дэмжлэгтэй Монголын Дүлий Иргэдийн Урчуудын Холбоотой хамтран уран бүтээлчдэд тэнцвэртэй, тэгш боломжийг олгох, тэдний бүтээн туурвих үйл явцыг дэмжих зорилготой “Аниргүй дэх өнгө” сонсголын бэрхшээлтэй уран бүтээлчдийн үзэсгэлэнгийн нээлт “Бэст” арт галерейд болно. /Урчуудын эвлэлийн хорооны 2-р давхарт/ Утас: 319015, 319017