"Ган зам" сонины өнөөдрийн дугаарт  "Ноцтой гэмтэлтэй 65 галт тэргийг актлах" талаар өгүүлжээ. Тодруулбал, Төмөр замын даргын өнгөрсөн оны тавдугаар сарын 15-ны өдрийн А-100 тоот тушаалын дагуу УБТЗ-ын ачааны паркийн 35 жилээс дээш ашигласан 784 галт тэрэгнээс нийтийн хэрэгцээний 431 галт тэрэгт оны өмнөхөн комиссийн үзлэг хийсэн байна. Удирдамжийн дагуу үзлэг, оношлогоо хийх явцад галт тэргүүдийн арал, тэвшний байдал нэлээд муудсан, гагнуур ихтэй, хүч нэмэгдүүлсэн нөхөөс тавьсан зэрэг гэмтэл илэрсэн аж. Түүнчлэн үзлэгт орсон 431 галт тэрэгнээс хүнд гэмтэлтэй 75, гэмтэлтэй 278, гэмтлийн зэрэг багатай 13 вагон байсан бөгөөд эдгээрээс техникийн ноцтой гэмтэлтэй, арал нь зэвэрсэн  арлын хотойлт зөвшөөрөгдөх хэмжээнээс хэтэрсэн нийт 65 галт тэргийг актлахаар болсон байна.

Харин хүнд гэмтэлтэй 75 галт тэргийг нэг жил хүртэл хугацаанд байнгын хяналтын дор ашиглах гэнэ. Актлахаар санал болгож буй галт тэргүүдийн 64 нь үлдэх өртөггүй, нэг нь 4230517 төгрөгийн үлдэх өртөгтэй байгаа аж.