ТОСК-ийн Ерөнхий захирал А.Гантулга үүрэгт ажлаасаа чөлөөлөгдөхөөр болжээ. Учир нь тэрбээр Нийслэлийн Иргэдийн Төлөөлөгчдийн хурлын сонгуульд нэр дэвшихээр болсон байна.

Энэ талаараа тэрбээр “Би ТОСК-ийн захирлаар ажиллаж байх хугацаандаа ямар ч байсан орон сууцны зээлийг найман хувь болгож, бодитой ажил болголоо. Удтал ярьсан Түрээсийн орон сууц хөтөлбөрийг эхлүүллээ. Удахгүй айлууд нь байрандаа орох гэж байна. Хотод "Буянт-Ухаа" 1, 2, хорооллыг ашиглалтад оруулж, аймгуудад мянган айлын орон сууц хөтөлбөр хэрэгжүүллээ. Энэ мэтээр тоочвол хийсэн эерэг сайн ажил олон байна. Энэ бүх ажил цаашид үргэлжлэх ёстой. Би энэ хугацаанд ажиллахдаа салбарын гурван сайдын нүүр үзлээ. Тиймээс эерэг сайн ажил үргэлжлэхэд тогтвортой байдал хамгийн чухал гэдгийг үнэндээ сайн ойлгосон. Тогтвортой байдлыг сонгууль эвддэг.

Магадгүй, АН-аас өөр нам яллаа гэхэд намайг энэ ажлаас өөрчлөх нь тодорхой. Энэ бол байх л ёстой улстөр. Би ч өөрөө улстөрийн намын шалгуураар энэ ажилд томилогдоод, харин ч улстөржихгүйгээр, хоёргүй сэтгэлээр зүтгэсэн. Тэгж чадсан учраас саяын ярьдаг амжилтад хүрлээ. Хотод гэхэд 7000 гаруй айл өрх байранд орлоо, ТОСК-иар дамжиж. Тиймээс би эхлүүлсэн энэ ажлаа үргэлжлүүлэх тогтвортой байдлын төлөө, энэ салбарын бодлогоо хамгаалж, өргөдлөө өгнө, сонгуульд өрсөлдөнө" гэлээ.