Сүүлийн өдрүүдэд олон нийтийн сүлжээгээр “Эрдэнэт” үйлдвэрийн удирдлагууд еврогийн урамшуулалт цалин авдаг тухай мэдээлэл цацагдаж буй. Үүнтэй холбоотойгоор Засгийн газраас "Эрдэнэт" үйлдвэрийг шалгаж, хариуцлага тооцох үзэх ёстой гэсэн байр суурийг олон нийтийн сүлжээний хэрэглэгчид хэлж байгаа. Мөн "Эрдэнэт" үйлдвэрийн 51 хувийг Монгол, 49 хувийг ОХУ эзэмшдэг. Тиймээс  гэрээний дагуу ажлаа хийж байгаа компаниудын үйл ажиллагаанд төр оролцох нь зохисгүй гэж үзэх хүмүүс ч бий.

Уг мэдээлэл цацагдсаны дараа "Эрдэнэт" үйлдвэрээс албан ёсны мэдэгдэл гаргасан. Уг мэдэгдэлд үйлдвэрийн дотоод мэдээлэлд хууль бусаар халдаж ийм мэдээлэл тараасан гэдгийг онцлоод удирдах албан тушаалтнуудад еврогоор цалин өгөхийг удирдах дээд байгууллага шийддэг гэсэн юм.

Харин Сангийн сайд Б.Болор энэ талаар “Хуульд гадаад валютаар цалинжина гэсэн журам байхгүй. Энэ талаарх мэдээллийг хэвлэлээс л олж харсан. Хэрэв энэ мэдээлэл үнэн бол Эрдэнэт үйлдвэрийг шалгана” хэмээсэн юм.