​Зам, тээврийн яамны Төрийн бичгийн дарга Б.Батзаяа тэргүүтэй албаны хүмүүс Япон Улсад албан ёсны айлчлал хийж байна. Энэхүү айлчлалын хүрээнд Төрийн нарийн бичгийн дарга тэргүүтэй төлөөлөгчид Японы агаарын тээврийн тэргүүлэгч компани болох ANA /All Nippon Airways Co., LTD/-ийн ерөнхийлөгч ноён Осаму Шинобе болон холбогдох удирдах хүмүүстэй уулзаж Монгол-Японы агаарын тээврийн салбарын хөгжил, хамтын ажиллагаа, үндэсний агаарын тээвэрлэгч “МИАТ” ТӨХК болон ANA компаний хамтын түншлэлийн асуудлаар санал солилцож ярилцлаа. Мөн ANA компанийн нислэгүүдээр дамжин Америкийн Нэгдсэн Улс болон бусад улс руу “МИАТ” ТӨХК-ийн зорчигч явах боломжуудын талаар ярилцсан бөгөөд уулзалт элэгсэг дотно болж өнгөрлөө. “МИАТ” ТӨХК болон ANA компани 1990 оноос хойш хамтран ажиллаж байгаа бөгөөд Япон улс дахь газрын үйлчилгээг гэрээгээр үзүүлдэг компани юм. Мөн өдөр Нарита нисэх буудлын тэргүүн дэд ерөнхийлөгч ноён Кеничи Фукая тэргүүтэй хүмүүстэй уулзаж, улам бүр өргөжиж байгаа Монгол-Японы найрамдалт харилцаа, түүнийг дагаад өсөж байгаа агаарын тээврийн зорчигч урсгалтай уялдуулан УБ-Токио-УБ нислэгийн давтамжийг нэмэгдүүлэх, цаашид Хөшигийн хөндийд баригдаж байгаа Улаанбаатар хотын шинэ нисэх буудлын үйл ажиллагаа явуулах менежментийг хийх боломжийн талаар ярилцлаа.