Америк тивийн орнуудын байгууллагын тэргүүн Луис Альмагро Венесуэл улсын асуудлаар шуурхай уулзалт зохион байгуулах хэрэгтэй гэж үзэж байна. Тэрээр байгууллагынхаа байнгын зөвлөлийн шуурхай уулзалтаар бүс нутгийн ардчиллыг хамгаалах, Венесуэл улсын эрх баригчид ардчиллын суурь зарчмуудыг зөрчсөн эсэхийг хэлэлцэхийг уриалжээ. Америк тивийн Кубаас бусад орныг эгнээндээ нэгтгэсэн тус байгууллага ийнхүү шуурхай уулзалт зарлан хуралдуулбал Венесуэл улсын гишүүнчлэл цуцлагдахад хүрч болзошгүй байна. Венесуэл улсын засгийн газрын нэр хүнд унаж, эдийн засгийн хүндхэн хямралд нэрвэгдээд байгаа.

Үүнтэй холбогдуулан Венесуэлийн ерөнхийлөгч Николас Мадуро өнгөрсөн сард улсдаа онц байдал зарласан нь эдийн засгийн хямралыг шийдвэрлэх гэхээсээ илүү сөрөг хүчний намуудын эсрэг Мадурогийн эрх мэдлийг нэмэгдүүлсэн гэх шүүмжлэлд өртөөд байгаа юм. Иймээс тус улсад авторитар дэглэмийг эсэргүүцэгчдийн дуу хоолой хүчээ авч, ерөнхийлөгч Николас Мадурог огцруулах өргөн хүрээтэй аян өрнөж эхлээд байна. Харин олон улсын хүрээнд Николас Мадурог хамгийн ил тодоор шүүмжилж байгаа байгууллагыг Америк тивийн орнуудын байгууллага гэж хэлэхэд хилсдэхээргүй байна.

Тус байгууллагын тэргүүн Луис Альмагро Мадуротой хэд хэдэн удаа ширүүн үг солилцоод амжсан. Энэ нь Венесуэл улс Өмнөд Америк дахь үнэнч холбоотнуудаа алдаж, бүс нутагтаа ганцаардаж эхэлснийг харуулж байна гэж барууны шинжээчид дүгнэж байна.