Япон улсын Засгийн газрын Соёлын ерөнхий буцалтгүй тусламжаар хэрэгжсэн "Монголын Үндэсний Музейн үзмэрийн хадгалалтын тоног төхөөрөмжийг сайжруулах төсөл"-ийн тоног төхөөрөмжийг хүлээн авах ёслол энэ сарын 17 буюу маргааш 15:00 цагт Монголын Үндэсний Музейд болох гэж байна.

Япон Улсын Засгийн газрын Соёлын буцалтгүй тусламжаар 2015-2016 онд “Монголын Үндэсний Музейн үзмэрийн хадгалалтын тоног төхөөрөмжийг сайжруулах төсөл"-ийг ЖАЙКА ба Монголын Засгийн газар хэрэгжүүлснээр түүх соёлын үнэт өвийг урт удаан хугацаанд зохистой байдлаар хадгалж хамгаалах үйл ажиллагаа шинэ шатанд гарч буй юм байна.

Тус музей нь балар эртнээс өнөөг хүртэлх үеийн Монголын түүх, өв соёл, угсаатны уламжлалт зан заншлыг илэрхийлсэн, үндэстний ялгарах онцлогийг агуулсан, дэлхийн хэмжээнд ховор нандинд тооцогдох 60 мянган үзмэрийг хадгалж хамгаалж байдаг. Япон улсын Засгийн газар Монгол Улсын хамгийн том музейд нийтдээ 38.3 сая иен буюу ойролцоогоор 800 сая төгрөгийн тусламж үзүүлжээ. 

Монголын Үндэсний Музей нь улс, аймаг орон нутгийн бусад музейг мэдээлэл, мэргэжил арга зүйн удирдлагаар хангах үүрэг хүлээдэг тул энэхүү тоног төхөөрөмжийг хүлээн авснаар Монгол Улсын нийт соёлын өвийн хадгалалт хамгаалалтыг сайжруулахад тодорхой хувь нэмэр үзүүлээд зогсохгүй нийт иргэдэд соёлын дархлаа суулгах, аялал жуулчлалын хөгжлийг эрчимжүүлэх зэрэг ач холбогдолтой юм.