Аваргуудын лигийн аварга Лондоны Челси баг, клубын дэлхийн аварга шалгаруулах тэмцээний хагас шигшээд Мексикийн Монтерритэй таараад байгаа билээ. 11-р сард нэг ч ялалт байгуулаагүй байсан Челси клуб Английн Примьер лигийн хүрээнд Сандэрлэндийг талбай дээр нь 3:1 ийн харьцаатай буулган авч, өмнө нь Аваргуудын лигийн хэсгийн сүүлчийн тоглолтонд Данийн аваргуудыг 6-1 ээр хожсон юм. Испани мэргэжилтэн Рафаэль Бэнитез энэ багийг удирдах болсноос хойш 4 тоглолтыг хийсэн бөгөөд эхний 2 тоглолтондоо хожил аваагүй ч, дараагийн 2 тоглолтондоо ялалт байгуулахад, 9 гоолыг өрсөлдөгчийхөө хаалганд оруулаад байгаа юм. Багийн ахлагч Жон Тэрри бэртлийн улмаас энэхүү тэмцээнд оролож чадхааргүй болсон юм. Харин дасгалжуулагчийн хувьд Рафа энэхүү тэмцээнд 3 дахь удаагаа ирж байгаа билээ. Тэрээр өмнө нь Ливэрпүүл, Интэр гэсэн багуудыг удирдан Японд ирж байсан юм. Багийн хамгаалагч Гари Кэхилл, дасгалжуулагч Рафа нар өчигдөр болсон бэлтгэлийн дараа хэвлэлийнхэнтэй уулзсан бөгөөд багийн хамгаалалт, тоглолтонд ахиц гарч байгааг онцолсон байна.
Харин тэдний өрсөлдөгч Монтерригийн хувьд өнгөрсөн улиралд төв болон хойд Америк, Карибын орнуудын аваргаар тодорсон юм. Бүс нутагтаа топ зэрэглэлийн багаар нэрлэгддэг тус клуб энэхүү тэмцээнд өмнө нь оролцож 5-р байр эзэлж байсан удаатай юм. Хоёр багийн тоглолт өнөө орой Йокохама хотын Интэрнэйшнэл цэнгэлдэхэд Монголын цагаар 18:30-д явагдах болно.