Нидерланд тоглогч Robin van Persie урд шөнө явагдсан Манчестерийн дербид ялалт байгуулсандаа ихэд баяртай байгаагаа илэрхийлжээ.

Английн Premier League-ийг тэргүүлэгчид болох Манчестер хотын United болон City клубууд 16-р тойрогт учраа таарч Sir Alex Ferguson-оор удирдуулсан Улаан Чөтгөрүүд Хотынхныг талбай дээр нь 2:3 харьцаагаар буулган авч маш чухал 3 оноогоо халааслаад байгаа билээ.

Талбайн зочин United-ийн довтлогч Rooney тоглолтын эхэнд 2 гоолыг оруулан Чөтгөрүүд тэргүүлж эхэлсэн бол, City-гийнхэн зөрүүлэн 2 гоолыг оруулж оноог тэнцүүлж чадсан ч Van Persie тоглолт дуусах эцсийн мөчид гоолдсоноор United-ийнхан 3 оноо авч City-гээс 6 оноогоор тасарч эхлээд байна.

Van Persie Sky Sports-д өгсөн ярилцлагадаа: “Бид тоглолтын эхлэлийг маш сайн тавьж чадсан. Rooney гайхалтай байж 2 гоолыг оруулсан.
Бид санаачлагыг гартаа авч байсан. Гэхдээ City үргэлж сэргэж чаддаг. Тоглолтын төгсгөлийг гайхалтай хийж, 3 оноо авсандаа их баяртай байна.
6 оноогоор илүү болно гэдэг, хамгийн ойр явж байсан өрсөлдөгчөө хожно гэдэг үнэхээр их баяртай явдал. Бид энэ ялалтаа тэмдэглэх болно” хэмээн хэлжээ.