Дэлхий даяар хоног тоолон хүлээж буй "Рио-2016" зуны олимпийг MҮОНРТ албан ёсны эрхтэйгээр шууд дамжуулан үзүүлэх эрх авснаасаа хойш бэлтгэл ханган, өдгөө гурван сувгаар зэрэг дамжуулахад хэдийн бэлэн болоод байна. Энэ талаар мэдээлэл хүргэхээр МҮОНРТ-ийн олимп хариуцсан продюсер Б.Мөнбатыг зочноор урилаа.

-Олимп эхлэхэд цөөхөн хоног үлдлээ. Бэлтгэл ажил хэр байна вэ?

-Бидний ажил нэгдүгээр сараас эхэлсэн болохоор бэлтгэл харьцангуй сайн хангагдсан гэж үзэж байгаа. MNB нэгдүгээр суваг, Монголын мэдээ суваг, MNB спорт сувгууд бүгд техникийн хувьд болон уран бүтээлчдийн хувьд бэлэн болсон. Газар дээрээс нь буюу Рио Де Жанейро хотоос манай таван уран бүтээлч мэдээ, мэдээлэл, нэвтрүүлгүүдийг хүргэхээр зориод байна.

-Онцгой эрхтэйгээр шууд дамжуулна гэдгийг хүмүүс янз бүрээр ойлгож, тайлбарлах юм. Та энэ онцгой эрхийн талаар тодруулахгүй юу?

-Манайх энэ эрхийг Японы “Дэнцү” гэдэг компаниас худалдан авсан. Учир нь энэ компани 2014 оны өвлийн олимпоос эхлээд 2021 оны олимп хүртэл Азийн 14 орны эрхийг худалдаад авчихсан байдаг. Тиймээс бид “Ази номхон далайн өргөн нэвтрүүлгийн холбоо”-гоор дамжуулан Монголын нутаг дэвсгэр дээр шууд дамжуулах эрхийг худалдан авсан. Энэ эрх нь дотроо арван таван дэд эрх багтаасан байдаг юм. Тодруулбал, каблийн сувгаар цацах эрх, агаарын телевизээр цацах эрх, интернэтээр түгээх эрх, радиогоор нэвтрүүлэх эрх, олон нийтийн газар үзүүлэх эрх гэх мэт. Эдгээр бүх эрхийг нь МҮОНРТ авсан учраас “онцгой” эрх гэж нэрлэгдээд байгаа юм.

-Олимпийн үеэр шууд дамжуулалтын хүрээнд үзэгчид ямар, ямар мэдээллээр хангагдах вэ?

-Монголын 50 тамирчин "Рио-2016" зуны олимпод хурд, хүч, авхаалж, самбаагаа сорин өрсөлдөнө. Энэ бүх тоглолтуудыг цаг алдалгүйгээр манай гурван сувгаас сонгон үзэх боломжтой. Мөн МҮОНТ "Рио-2016"-д зориулаад “Сайн байна уу Рио” гэсэн 60 минутын шууд нэвтрүүлгийг үзэгч түмэндээ өдөр бүр 19-өөс 20 цагийн хооронд хүргэнэ гэх мэт үзүүштэй, харууштай олон сайхан мэдээ, мэдээлэл, хөтөлбөр, тоглолтуудыг бэлтгэн, ажиллаж байна даа.

-МҮОНРТ гурван сувгаар шууд дамжуулахад бэлэн болсон гэлээ. Яагаад гурван сувгаар дамжуулахаар болсон юм бэ?

-Тиймээ, бид гурван сувгаар дамжуулан үзэгчдэд "Рио-2016" зуны олимпийг хүргэнэ. Учир нь 16 хоногийн турш маш олон төрлийн спортын наадам зохион байгуулагдана. Тэр бүгдийг нэг бүрчлэн үзүүлэхийн тулд бид “MNB спорт” гэсэн сувгийг нээсэн юм. Харин манай үзэгчид өөрийн дуртай, сонирхдог төрлүүдээ MNB үндэсний телевиз, Монголын мэдээ суваг, MNB спорт сувгаас сонгон үзэх бүрэн боломжтой болсноороо онцлог.

-Олимпийн дараа MNB спорт суваг хэрхэн ажиллах вэ?

-Цаашдаа спортын төрөлжсөн суваг болоод үйл ажиллагаагаа өргөжүүлээд явна.

-Олимп шууд дамжуулахад Үндэсний телевизийн сэтгүүлч, хөтлөгч нараас гадна 42 тайлбарлагч авч ажиллуулж байгаа гэж сонссон. Ямар шалгуураар хэрхэн сонгосон бэ?

-Тиймээ, 42 тайлбарлагч бидэнтэй хамтран ажиллана. Эдгээр хүмүүсийг олон нийтийн санал, санаачилгын дагуу нэлээд урт хугацаанд, няхуур судалсаны үндсэн дээр сонгосон. Мэргэжлийн хүмүүс гэдгээрээ олон давуу тал бий болгоно шүү дээ. Эдгээр хүмүүс маань тухайн спортыг маш сайн судалсан, туршлагатай, мэргэшсэн гэж хэлж болно. Тодруулбал, Волейболын тэмцээн наймдугаар сарын 6-наас 21-ний хооронд тоглогдоно. Тоглолт “MNB спорт” сувгаар дамжуулагдана. Тайлбарлагчаар Ц.Бат-Энх ажиллана. Харин Жүдо бөхийн тэмцээн 8 дугаар сарын 6-наас 12-ны хооронд тоглогдоно. Тоглолтыг MNB нэгдүгээр сувгаар дамжуулна. Тайлбарлагчаар Б.Шижир ажиллана. Нэг үгээр хэлбэл, тухайн спортоороо "нэвтэрхий толь" болсон тайлбарлагч нар ажиллаж байгаа учраас танин мэдэхүйн маш их ач холбогдолтой гэж хэлж болох юм. Тиймээс үзэгчдийн хүсэл сонирхолд нийцэх байх гэж найдаж байна.

-"Рио-2016" зуны олимпийн шууд дамжуулалтын үеэр хамтран ажиллах хувь хүн, байгууллагууд хэрхэн холбогдох вэ?

-МҮОНРТ-ийн үүд хаалга үргэлж нээлттэй. Бидэнтэй ирээд уулзаж болно. Бид тухайн байгууллагын зар сурталчилгааг телевизээр хүргэхээс гадна Бразилд байгаа уран бүтээлчидтэй холбогдож “Маракана” цэнгэлдэх хүрээлэнгээс сурталчилгаа хийх боломжтой гэдгийг бас дуулгачих нь зөв болов уу.

-Ярилцсанд баярлалаа