БНСУ-ын Сөүл хот дахь Монгол сургууль нь анх 1999 онд  18 монгол хүүхэдтэйгээр үйл ажиллагаагаа эхлүүлж байсан өдгөө 35 ажилтан 83 сурагчтай  хичээллэж байна. Жил ирэх тусам Сөүл хотод амьдрах монгол иргэдийн тоо олширч  сургуулийг өргөжүүлэх шаардлага үүсчээ.  Ингээд  2008 оноос хойш төсвөөсөө хуримтлуулсан 2,8 тэрбум вонын  хөрөнгөөр өргөтгөл барьж эхэлжээ. Барилгыг  энэ оны 4 сараас эхэлсэн бөгөөд 2014 оны хичээлийн шинэ жилээр ашиглалтад оруулахаар төлөвлөжээ. Өргөтгөл ашиглалтад орсноор 1-12 ангийн 300 хүүхэд элсүүлэн суралцуулах боломжтой болох юм.

 Тиймээс Монгол улсаас сурагч солилцооны хөтөлбөрийн дагуу  хүүхэд нэмж элсүүлэх, шинээр багш ажилтан авах зэрг ажлууд хийгдэх юм байна. Тус сургуулийн хичээлийн хөтөлбөр хоёр улсын боловсролын яамны хяналтан дор боловсруулагдаж батлагддаг бөгөөд монгол хүүхдүүдэд эх хэл түүхийн хичээлийг нь түлхүү судлахад анхааран ажилладаг талаараа дурдлаа. Түүнчлэн солонгос хэлний боловсролд  онцгойлон анхаарч, гуравдагч хэл сургах зорилт тавин ажилладаг аж.  Сургуульд хүүхдээ элсүүлэх хүсэлтэй эцэг эхчүүд хүүхдийнхээ төрсний гэрчилгээний хуулбар, эцэг эхийн гадаад паспортын хуулбар, сурагчийн хувийн зэрэг материалыг бүрдүүлэн, сургуулийн захиргаанд хандаснаар суралцах эрхээ баталгаажуулах юм.

Дашрамд дурдахад,  өргөтгөлийн нэг турбумын хөрөнгийг тус сургуулийн Удирдах зөвлөлийн гишүүн, Үйл ажиллагаа хариуцсан захирал Юу Сүн Жү хувиасаа гаргаж байгаа аж.