Өмнөд Солонгосын анхны бөгөөд цорын ганц сансрын нисгэгч эмэгтэй, 36 настай И Су Ён  нөхрөө даган явах болсноос үүдэн тус улсын Сансар судлалын төвийн судалгааны ажилтаны албан тушаалаасаа сайн дураараа татгалзсан нь олон нийтийн шүүмжлэлд өртөөд байгаа аж.

И Су Ён нь БНСУ сансрын нисгэгчтэй улс болохоор бэлтгэлээ базааж байсан 2005-2006 онуудад 36 мянган  өрсөлдөгчөө ардаа орхин анхны сансарт нисэх иргэнээр тодорч, 2007 оны  гуравдугаар сараас эхлэн 15 сарын турш ОХУ-ын Сансарын төвд бэлтгэл хийж байжээ.

Тэрбээр 2008 оны дөрөвдүгээр сарын 08-нд ОХУ-ын Союз сансрын хөлгийн багт багтан, сансарт ниссэн юм. Түүнийг сансарт нисэх хугацаанд нийт 18 төрлийн судалгаа, туршилтыг хийж гүйцэтгэсний дотор сансарт кимчи хэрэглэж болох эсэх гэх мэт энгийн туршилт ч багтаж  байжээ. 

БНСУ сансрын нисгэгчтэй болох зорилгоор 26 тэрбум вон зарцуулсан ч ийнхүү анхны сансарт ниссэн иргэн нь гадаадын харьяат болж буйд иргэд шүүмжлэлтэй хандаж, "Анхны сансарт ниссэн хүнийг буруу сонгосон байна" хэмээн эрс шүүмжилж байгаа гэнэ.