Олон улсын засгийн газруудаас ирүүлсэн Facebook-ийн хэрэглэгчдийн мэдээллийг авах хүсэлтийн тоо энэ оны эхний хагаст өмнөх зургаан сартай харьцуулахад 24%-иар өсч, бараг 35 мянгад хүрсэн байна. Энэ талаар Facebook компани албан ёсоор мэдээллээ. Үүнээс гадна тухайн улсын хуулиас шалтгаалан Facebook-ийн хориглогдсон контентын хэмжээ дурдсан хугацаанд 19%-иар нэмэгджээ.

АНУ-ын шүүх 400 хэрэглэгчийнхээ мэдээллийг шилжүүлж өгөхийг Facebook-т үүрэгдээд байгаа ч тус компани энэ шийдвэрийг эсэргүүцэж байгаа юм. Дэлхийн хамгийн том нийгмийн сүлжээ сайтын удирдлагууд засгийн газруудаас ирүүлсэн хүсэлт болгоныг хууль эрхзүй болон бусад талаас нь сайтар нягталж, хангалтгүй гэж үзвэл хүсэлтийг биелүүлэхээс татгалздаг гэдгээ мэдэгдээд байна.

Facebook түүнчлэн энэ жил хэрэглэгчдийнхээ хувийн мэдээллийг хамгаалахад чиглэгдсэн хэд хэдэн функцийг гаргаад байгаа юм. Тухайлбал өнгөрсөн 4-р сард гүйцэтгэх захирал Марк Закерберг гуравдагч гар утасны аппликейшнүүдтэй хуваалцах хувийн мэдээллийн хэмжээг хязгаарлах боломжийг хэрэглэгчдэд олгох шинэ функцуудыг танилцуулжээ.

РАЛЬДИЙ.А /shuum.mn/