Барселонагийн  хөл бөмбөгийн од Лионель Месси өөрийн твиттэр хуудсаараа дамжуулан олон нийтийн сүлжээнд шуугиан тариад буй хамгийн бяцхан шүтэн бишрэгч, Афганистан хүүг хайж байгаагаа илэрхийлжээ.

Лионель Мессигийн өмсгөлийг нэг удаагийн уутаар орлуулан хийж, өмссөн Афган хүүг Муртаза Ахмади гэдэг бөгөөд тэрбээр өдгөө таван настай гэнэ.

ВВС-гийн мэдээлснээр хүүг Иракийн Курд хэмээн үзэж байгаа юм. Тэд өөрсдийн цахим хуудсандаа “Мессийгийн хамгийн том фэн” нэртэйгээр энэхүү зургийг түгээсний дараа алдарт хөл бөмбөгчин түүнийг хайж эхэлсэн байна.

Месси энэ талаараа “Би энэ хүүг олж өөрийн өмсгөлөөсөө бэлэглэмээр байна. Өнөөдрөөс эхлэн эрлээ эхлүүллээ” гэсэн юм. Тэрхүү хайх ажиллагаа эхэлсний дараа хүүгийн ах Ариф Ахмади Муртазагийн зургийг цахим сүлжээнд тавьж, өмнө нь тавьж байсан зургаа ч харьцуулан нийтэлсэн байна.

Тэрбээр нийтлэлдээ “Миний дүүг хайж байгаа Мессид баярлалаа. Энэ дүүд маань маш их урам зориг өгч байгаа. Тэр том болоод алдартай хөл бөмбөгчин болох мөрөөдөлдөө автагдан байна” гэжээ.