Гурван бүлэг болж гарч буй энэ киног би анх үзэхдээ үнэхээр шүүмжлэлтэй хандаж байлаа. Хүүхдүүдэд зориулсан уран бүтээл гэдэг огт өөр баймаар. Гэтэл тэр кинонд хүүхдүүдийн биш харин насанд хүрсэн хүмүүсийн харилцаа илэрхийлэгдсэн байсан. Эхний цувралд нь хүн баян бол түүнтэй сайхан харилцах хэрэгтэй, ядуу бол хэн ч биш болно гэсэн санаа. Харин дараагийн цувралд нь хот, хөдөөгийн хүүхдүүдийн ялгааг харуулж. Гэхдээ хүүхдүүдэд эерэг сэтгэлгээ төрүүлэхүйц хөгжилтэй байдлаар биш хотын хүүхдүүд ийм харилцаатай, тансаг хэрэглээтэй, монгол ахуйгүй мунхаг сэтгэлгээтэй гэдгийг өнөөх л хэрүүл, бие биесээ үзэн ядах сэтгэлгээ, бусдад муу санаж болдог гэдгийг харуулсан үйлдлүүдээр илэрхийлсэн байдаг. Киноны дуун дээрээ хүртэл “Хотын охид хөгжилтэй..” гэж дуулна.

 

Энэ кино гарсан даруйдаа хүүхдүүдийн дунд нэлээд эрэлттэй байсан. Томоохон гэгдэх бүхий л телевизийн сувгуудаар гарч, кинонд тоглосон хүүхдүүд нь тэдний хэлдгээр “од” болцгоосон. Уран бүтээлчдийн зарим нь СТА цол тэмдэг ч хүртэж байсан.

 

Уран бүтээл талаасаа кино нь чухам ямар болсныг мэргэжлийн хүмүүс дүгнэсэн байх. Харин би киноны нийгэмд хүргэж буй санаа нь хямдхан байсан гэдгийг л хэлмээр байна.

 

Нэг хэсэгтээ хандалт өндөртэй байсан кино тэгсгээд намжсан.

 

Харин өнгөрсөн долоо хоногийн амралтын өдрөөр SBN телевизээр “Адтай жаалууд” киноны гуравдугаар бүлгийн 39, 40 дүгээр анги гарч байхыг нь үзэж таарлаа. Сургуулийн шилдэг хүүхдүүдийг багш нь дагуулж яваад Эрээн хот үзүүлж байгаа бололтой. Харин орой нь буудалдаа очоод хоёр хүүг үймүүлж, орондоо хувцастайгаа орлоо гэж багш нь загнаж байна. Тэрхэн үед би зохиолын дагуу жүжиглэж байгаа кино биш, нууцаар хийсэн бичлэг үзэж байгаа юм шиг л санагдлаа. Багш нь хоёр хүүг ээлжлэн чичлэж, дээр нь хувцаснаас нь угзчиж ирээд л загнаж байх юм. Зарим хүмүүсийн нүдэнд бол тэр мундаг жүжигчин эмэгтэй харагдсан байх. Гэхдээ багш нарын нийтлэг төрх, аашийг мэддэг хүнд бол тэнд яг бодит байдлыг л харуулсан үйлдэл. Энэ чинь хүүхдүүдэд зориулсан уран сайхны кино шүү дээ. Бодит байдал дээр тийм байдаг гэдгийг найруулагч нь мэддэг байж болно. Гэхдээ үүнийг баримтат кинонд ашиглаж, эрэн сурвалжлах нэвтрүүлэг хийж байгаа бол нэг өөр.

 

Нөгөө талаасаа тэнд хүүхдийн эрхийг аймшигтайгаар зөрчиж болно гэдгийг нийгэмд үзүүлж байна.

 

Энэ хэсэг бол хэдэн зуун ангитай тэр киноны ердөө хоёрхон минутын л хэсэг. Гэтэл энэхэн хэсэг минутын үйлдлээр ийм олон асуудлыг үүсгэж байхад түүнийг үзэж байгаа хүүхдүүдэд, үзэгчдэд ямар сэтгэгдэл төрж байгаа бол оо?

 

Нэг зүйлийг тодруулж  хэлье. Эрхэм хүндэт Боловсролын сайд аа, багш нарын чинь үнэн төрхийг хэтэрхий бүдүүлгээр илэрхийлж байгааг анхааралдаа аваарай.