Үндэсний телевиз
Цагийн хүрд
Найм арваннэг
Өнгөрсөн баасан гарагийн шөнө манай улсад өөрийн газар шороон дээрээ гадны иргэдэд барьцаалагдсан онц ноцтой хэрэг гарсан талаар мэдээлэл шуугиан тарьсан билээ. Улмаар хэргийн газарт БНХАУ-ын элчин сайд иргэдээ өмөөрөхөөр очлоо хэмээсэн мэдээлэл олны дургүйг бүр ч ихээр хүргэсэн гэхэд болно.
Тэгвэл өчигдөр ЦЕГ-ын Хэвлэл мэдээллийн төвийн ажилтан, цагдаагийн ахмад Н.Төгсбаяр энэ хэргийн талаар “Баян-Өлгийд хүн барьцаалсан хэрэг гараагүй. Барьцаална гэдэг чинь өөр ойлголт ” хэмээсэн тодруулга өгсөн байх юм.
Тодруулбал Баян-Өлгий аймгийн Толбо нуурын ойролцоо шөнийн 00.00 цагийн үед явж байсан “Ланд-80” маркийн машинтай иргэдийг зам засварын ажил хийж буй Хятад иргэд хүнд даацын машинаар мөргөжээ. Тэд тохиролцоонд хүрч салсан боловч хэсэг хугацааны дараа 60 орчим Хятад ажилчид гарч ирэн, манай улсын иргэдийг саатуулсан аж.
Уг хэргийн тухай мэдээллээр шөнийн 02.00 цагийн үед Баян-Өлгийн аймгийн Засаг даргын тамгын газар, аймгийн цагдаагийн бие бүрэлдэхүүн, аймгийн гадаад иргэн, харьяатын асуудал эрхэлсэн газар хамтран очиж, хэлэлцээ хийснээр өнгөрсөн Ням гарагийн 15:00 цагийн үед иргэдийг сулласан байна.
Тэгэхээр уг хэргийн талаарх мэдээлэл иргэдэд барьцаалсан эсвэл зөвшилцөлд хүрч чадаагүй гэсэн хоёр өнцөг дээр төөрөгдөл үүсгэхэд хүрээд байна.
Я.Цэвэлийн “Монгол хэлний товч тайлбар толь”-д “Барьцаалах” хэмээх үгийн утгыг Данж болгон авах хэмээн тайлбарласан бий. Данж гэдэг нь манай оронд хятадын худалдаачдын оруулж ирсэн нэршил бөгөөд тухайн үед Данж барьж мөнгө зээлдүүлэн өгөх хэмээн ярьдаг байжээ. Эндээс ямар нэгэн зүйлээ барьцаанд /данж болгон/ үлдээгээд өөрт хэрэгтэй зүйлсээ авах гэсэн утга гарч ирнэ.
Өөрөөр хэлбэл хоёр талын тодорхой үндслэл дээр зөвшилцөн данж барих үйл ажиллагаа явагддаг байж л дээ. Гэхдээ хүн барьцаалах гэсэн утгаар бол арай өөр нэг, талын илт давамгайллаар хүчирхийлэн данж барих хэлбэр гарч ирэх нь тодорхой.
Яг энэ утгаар хөөвөл монгол улсын энгийн нэгэн гэр бүл машинд мөргүүлчихээд, за яахав хэмээн зөвшилцөлд хүрч л дээ. Тийнхүү жаахан тайвширч байтал гэнэт 60 гаруй хятадууд нэвсийгээд гараад ирж. Мэдээж хятадууд шөнө дөлөөр сайн санаа өвөрлөж тус гэр бүлийг бүлэглэн саатуулаагүй нь тодорхой.
Харин сандарсан гэрийн эзэд ийм тохиолдолд хамгийн түрүүнд цагдаа дуудаж, Монгол улсын төрөөр хамгаалуулах эрхээ эдлэх боломж ч олдоогүй байна. Хэрвээ хэргийн газарт тус аймгийн гадаад иргэн харьяатын асуудал эрхэлсэн газрынхан очиж, хэлэлцээ хийгээгүй бол манайхны "барьцаалах" гэх нэрнээс тойроод байгаа эл саатуулалт чухам хэдий болтол үргэлжилж, ямар үр дагавар дагуулах байсныг хэн ч таашгүй.
Тухайн үед хоёр талын хооронд зөрчилдөөн үүссэн байсан ч хэргийн газарт цагдаагийн бие бүрэлдэхүүн очиж, ажиллагаа явуулах тийм хүнд нөхцөлд хүрээгүй байсан тул ЦЕГ-ын Хэвлэл мэдээллийн төвийн ажилтан, цагдаагийн ахмад Н.Төгсбаяр “хүн барьцаалсан явдал болоогүй” хэмээн мэдэгдсэн бололтой. Өөрөөр хэлбэл хуулийн нэршил нь ийм тохиолдлыг хүн барьцаалах хэмээн үздэггүй аж.
Гэхдээ нөгөө талаас харанхуй шөнөөр манай улсын иргэдийг бүлэглэн саатуулж, бүхэл бүтэн 10 гаруй цаг хорьсон нь Хятадууд хүчирхийлэн данж барихыг оролдсон гэхэд нэг их хилсдэхгүй. Энэ мэтээр Монголын төр хятад ажилчдын толгойг илсээр байх уу? гэсэн асуулт дахиад л урган гарч ирнэ.
| Баян-Өлгийд хүн барьцаалсан хэрэг гараагүй гэв үү? | ||
| Үзсэн: 3711 | Mongolian National Broadcaster |
Б.Баярсайхан
У.Баярсайхан
М.Золзаяа
Сэтгэгдэл бичих:
АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.