Нийслэл, орон нутгийн Эрүүл мэндийн газар, цусны салбар банкийг хамруулан халдварт өвчний эрт сэрэмжлүүлэг, хариу арга хэмжээний бэлэн байдалд хийсэн шалгалтын дүнг Мэргэжлийн хяналтын газраас мэдээллээ. Монгол Улсын Аюулгүй байдлын Зөвлөлийн зөвлөмж, Мэргэжлийн хяналтын газраас гаргасан “Эбола вируст халдварын болзошгүй аюулаас урьдчилан сэргийлэх, бэлэн байдлыг хангах ажлын төлөвлөгөө”-ны дагуу халдварт өвчний эрт сэрэмжлүүлэг, хариу арга хэмжээ, цар тахлын үед шаардагдах бэлтгэл шаардлага хангаж буй эсэхэд шинжилгээтэй хяналт шалгалтыг тус газраас зохион байгуулжээ.

Орон нутгийн Эрүүл мэндийн газруудын 71 хувь нь есөн нэрийн 14 төрлийн хувийн хамгаалах хэрэгслийн нөөцтэй хэдий ч нэг удаагийн маск, малгай, бээлийнээс бусад нь шаардлага хангахгүй, цөөн тоотой байжээ. Мөн эрүүл мэндийн газруудын 57 хувь нь 1-3 нэрийн халдваргүйтгэлийн бодисын нөөц хангалтгүй дүнтэй байна. Тухайлбал, Говь-Алтай, Дундговь, Завхан, Орхон зэрэг долоон аймаг хувийн хамгаалах хэрэгсэлийн, есөн аймаг халдваргүйтгэлийн бодисын нөөцгүй байжээ. Долоон аймгийн нөөцөд байгаа халдваргүйжүүлэх бодисд хийсэн шинжилгээгээр жавелионд агуулагдах идэвхит хлорын агууламж 83,3 хувьд нь шаардлага хангахгүй байсан аж. Эмнэлгийн ариутгал, халдваргүйтгэлд хэрэглэх химийн бодисын жагсаалтад ороогүй шахмал хлораминийг Баян-Өлгий, Дархан-Уул, Хөвсгөл зэрэг аймгуудад хэрэглэж байсан зэрэг зөрчил илэрчээ.